Pre Monsoon Rain: रेकॉर्डब्रेक 'मान्सूनपूर्व'! 983 टक्क्यांहून अधिक पाऊस बरसला; अरबी समुद्रात कमी दाबाचा पट्टा

पणजी: राज्यात मागील चार दिवसांपासून जोरदार मान्सूनपूर्व पाऊस बरसला आहे. मागील दहा-पंधरा वर्षांत सरासरी मान्सूनपूर्व पावसाच्या तुलनेत तब्बल ९८३ टक्क्यांहून अधिक पाऊस पडल्याचे एनआयओचे शास्त्रज्ञ (निवृत्त) एम.आर. रमेशकुमार यांनी सांगितले.

डॉ. रमेशकुमार म्हणाले, हा एवढ्या मोठ्या प्रमाणात पाऊस पडण्याचे मुख्य कारण अरबी समुद्रात तयार झालेला कमी दाबाचा पट्टा होय. त्याच्या प्रभावामुळे राज्यातील सर्व केंद्रांवर २५५ मिमी म्हणजेच १० इंचाहून अधिक पाऊस आत्तापर्यंत पडला असल्याचे त्यांनी सांगितले.

राज्यात आतापर्यंत सर्वाधिक मान्सूनपूर्व पाऊस हा धारबांदोड्यात बरसला आहे. धारबांदोड्यात तब्बल २१.२२ इंच, त्या खालोखाल मडगाव २१.१७ इंच, दाबोळी २०.३१ इंच, मुरगाव १९.३३ इंच, केपे १८.६१ इंच, म्हापसा १८.३३ इंच, पेडणे १६.५५ इंच, फोंडा १६.५४ इंच, साखळी - १५.६२ इंच, जुने गोवे १५.०६ इंच, पणजी १४.७० इंच, काणकोण १२.४४ इंच, तर वाळपई येथे १०.४ इंच पावसाची नोंद करण्यात आली आहे.

‘मान्सूनपूर्व’चा लेखाजोखा

मान्सूनपूर्व सर्वात कमी पाऊस

२५५.१ मिमी. (१०.०४ इंच)

आतापर्यंत राज्यात बरसलेला मान्सूनपूर्व पाऊस

४३६.१ मिमी. (१७.१६ इंच)

सरासरी पावसाच्या तुलनेत अधिक पाऊस

९८३.४ टक्के

मान्सूनपूर्व सर्वाधिक पाऊस-धारबांदोडा

५३९ मिमी. (२१.२२ इंच)