कोकण रेल्वेच्या मडगाव स्थानकावर रेंट अ बाईकच्या प्रस्तावित सुविधेला फातोर्डाचे आमदार विजय सरदेसाई यांनी कडाडून विरोध केला. कोकण रेल्वेची ही सेवा काही झाले तरी आम्ही मडगावात सुरु होऊ देणार नाही, असे सरदेसाई म्हणाले. तसेच, यासाठी त्यांनी आंदोलनाचा देखील इशारा दिला आहे.

कोकण रेल्वेने करमळी स्थानक परिसरात लेक व्ह्यू रेस्टॉरंट उभारणार असल्याचे तसेच, मडगाव स्थानकासह इतर महत्वाच्या स्थानकांवर रेंट अ बाईकची सुविधा सुरु करणार असल्याचे जाहीर केले आहे. कोकण रेल्वेचे अध्यक्ष आणि व्यवस्थापकीय संचालक संतोष कुमार झा यांनी माहिती दिली आहे.

याबाबत आमदार विजय सरदेसाई यांनी पत्रकार परिषद घेत रेल्वेचे काम ट्रेन वेळेवर सोडण्याचे असून त्यांनी व्यवसायात पडू नये. शिवाय त्यांनी आमदार दिगंबर कामत यांच्यावर देखील टीका केली.

रेंट बाईक, रेंट कार, हॉटेल हा गोंयकारांचा व्यवसाय. पण, रेल्वे पर्यटन व्यवसायत येऊन स्थानिकांच्या पोटावर पाय देण्याचा प्रयत्न करत असल्याचा आरोप आमदार विजय सरदेसाई यांनी केला.

सरदेसाई यांनी मडगावचे आमदार दिगंबर कामत यांच्यावर टीका करताना, कोकण रेल्वेचा हा प्लॅन त्यांना माहिती होता का? असा सवाल उपस्थित केला. तसेच, कामत दक्षिण मडगावसाठी एक मास्टर प्लॅन तयार करत आहेत, त्याचाच हा एक भाग आहे का? याबाबतही त्यांनी स्पष्टिकरण द्यावे असे सरदेसाई म्हणाले.

तसेच, कोकण रेल्वेच्या प्रस्तावित सुविधेबाबत कामत यांना माहिती नाही असे म्हटल्यास ते त्यांच्या या प्लॅनला विरोध करतील का? याबाबत त्यांनी माहिती द्यावी, असे सरदेसाई म्हणाले.

पर्यटनमंत्री खंवटे यांना तरी याबाबत काही माहिती आहे का? असा सवाल सरदेसाई यांनी उपस्थित केला.

मडगावकरांना एकत्र येण्याचे आवाहन

कोकण रेल्वेच्या या प्लॅनविरोधात मडगावकरांनी एकत्र येण्याचे आवाहन विजय सरदेसाई यांनी केले. मडगावमधील टॅक्सी चालक, रेंट बाईक चालक यांच्या मुलांचे भवितव्य धोक्यात असल्याचे सरदेसाई म्हणाले. सरदेसाई यांनी कोकण रेल्वेच्या या प्रस्तावित प्लॅनचा निषेध करत आमदार दिगंबर कामत यांच्यावर टीका केली.