पणजी: नुकत्याच पार पडलेल्या गोवा विधानसभेच्या पावसाळी अधिवेशनात गाजलेल्या विविध मुद्यांमध्ये बाऊन्सर्सचा मुद्दा देखील चांगलाच गाजला. राज्यात बाऊन्सर्स दादागिरी करत असल्याचे आसगाव प्रकरणाचा दाखला देत आमदार विजय सरदेसाई यांनी मुद्दा उपस्थित केला होता. याच मुद्यावरुन भाजपने सरदेसाईंची फिरकी घेतली असून, त्यांना दोन तोंडाचे मांडूळ म्हटले आहे.

भाजपने आमदार विजय सरदेसाई यांचा एक व्हिडिओ शेअर केला आहे. यात सरदेसाई बाऊन्सर्सच्या बाबतीत दोन वेगवेगळी मतं मांडताना दिसत आहेत. नुकत्याच पार पडलेल्या विधानसभेत विजय सरदेसाई यांनी बाऊन्सर्स कोण आहेत? याबाबत प्रश्न उपस्थित करत चिंता व्यक्त केली होती.

त्याचवेळी विजय सरदेसाई मंत्री असताना त्यांनी बाऊन्सर्सचे समर्थन केल्याचे या व्हिडिओतून दिसत आहे. भाजपने सरदेसाई यांच्या दोन वेगवेगळ्या भूमिकांवर टीका करताना त्यांना दोन तोंडाचे मांडूळ म्हणून संबोधले आहे.

गोवा भाजपच्या एक्स हँडलवरुन हा व्हिडिओ शेअर करण्यात आला आहे. व्हिडिओच्या शेवटी अक्षय कुमारच्या खट्टा मिठ्ठा चित्रपटातील मीम जोडण्यात आले आहे.

आसगाव येथील आगरवाडे कुटुंबियांच्या घराची मोडतोड करण्यात आली. यात बाऊन्सर्सच्या सहभागावरुन पावसाळी अधिवेशनात प्रश्न उपस्थित करण्यात आला. बाऊन्सर्स कल्चर राज्यासाठी धोकादायक असल्याचा दावा करत अशा संस्थांवर नियंत्रण ठेवण्याची गरज अधिवेशनात व्यक्त करण्यात आली.

मुख्यमंत्री प्रमोद सावंत यांनी बाऊन्सर्सच्या दादागिरीबाबत ठोस उपाययोजना करण्याबाबत सकारात्मकता दर्शवली. यासाठी विशेष विधेयक देखील सादर केले जाणार आहे. आगामी विधानसभा अधिवेशनात ते मांडले जाण्याची शक्यता आहे.

दरम्यान, भाजपने विजय यांच्यावर निशाणा साधत त्यांच्या दोन भूमिकांमध्ये मतभेद असल्याचे व्हिडिओतून म्हटले आहे.