धर्मरक्षणासाठी कोणत्याही पातळीवर जाण्यास तयार, दवर्लीतील छत्रपती संभाजी महाराज पुतळ्याचा वाद तीव्र

मडगाव: रुमडामळ दवर्ली येथील छत्रपती संभाजी महाराजांच्या पुतळ्याचा वाद तीव्र झाला आहे. धर्मरक्षणासाठी कोणत्याही पातळीवर जाण्यास तयार असून, धार्मिक फूट पाडण्याचा प्रयत्न करु नये, असा इशारा शिवप्रेमी विनायक वळवईकर यांनी दिला आहे. मारुती मंदिर ट्रस्टचे अध्यक्ष पांडुरंग उर्फ भाई नायक लोकांची दिशाभूल करत असल्याचा आरोप वळवईकरांनी केला.

मंदिराच्या परिसरात असलेल्या पुतळ्यामुळे मारुती मंदिराच्या परिक्रमेला अडथळा निर्माण होत असल्याचा दावा ही पूर्णपणे दिशाभूल असल्याचे विनायक वळवईकर म्हणाले. तसेच, पुतळा स्थलांतरांचा पर्याय अमान्य असल्याचे वळवईकरांनी स्पष्ट केले.

छत्रपती संभाजी महाराजांच्या पुतळ्यासंबधित कोणताही वाद नाहिए. उद्घाटनाला न बोलवल्याने भाई नायक यांचा अहंकार दुखावला गेला, त्यामुळे केवळ त्यांनाच याबाबत समस्या आहे, असे वळवईकर म्हणाले.

धर्मात फूट पाडण्याचा प्रयत्न करु नये. धर्मरक्षणासाठी कोणत्याही पातळीवर जाण्यास तयार असल्याचा इशारा शिवप्रेमी विनायक वळवईकर यांनी यावेळी दिला.

ट्रस्टचे आमच्यासोबत फार उत्तम संबंध आहेत केवळ एका व्यक्तीला समस्या असल्याने वाद होत असल्याचे विनायक वळवईकर भाई नायक यांच्यावर टीका करताना म्हणाले.

संभाजी महाराजांचा पुतळा इतरत्र हलविण्याची मागणी मान्य नसल्याचे वळवईकरांनी सांगितले. त्याचवेळी जिल्हाधिकारी देतील तो निर्णय मान्य असल्याचे यावेळी वळवईकर म्हणाले.

दरम्यान, याबाबत तोडगा काढण्यासाठी ०८ ऑगस्ट रोजी उपजिल्हाधिकारी यांच्यासमोर घेतलेल्या बैठकीत ठोस उपाय निघाला नाही. त्यामुळे याबाबत पुढील बैठकीत निर्णय होण्याची शक्यता वर्तवली जात आहे.