Venzy Viegas About Suleman Khan Viral Video

पणजी: सिद्दिकी ऊर्फ सुलेमान खान याचा व्हिडिओ आत्ताच व्हायरल कसा झाला. त्याला जर दोन दिवसांपूर्वी अटक केली होती, तर व्हिडिओ कसा आणि कोणाद्वारे तो व्हायरल करण्यात आला, याविषयी आम आदमी पक्षाचे आमदार व्हेन्झी व्हिएगस यांनी प्रश्न उपस्थित केला आहे.

जुने गोवा पोलिस स्थानक आपचे राज्य संयोजक ॲड. अमित पालेकर यांना जबाब नोंदविण्यासाठी पोलिसांनी समन्स बजावून सोमवारी बोलावून घेण्यात आले होते. ॲड. पालेकर यांना पाठिंबा देण्यासाठी आपचे आमदार व्हेन्झी व्हिएगस आणि क्रूझ सिल्वा यांच्यासह कार्याध्यक्ष वाल्मिकी नाईक व इतर पदाधिकाऱ्यांनी पोलिस स्थानकात धाव घेतली होती. एका बाजूला ॲड. पालेकर यांचा जबाब पोलिसांमध्ये नोंदविला जात होता, तर त्याच दरम्यान सुलेमानचा व्हिडिओ व्हायरल झाल्याने त्यावर तत्काळ आमदार व्हेन्झी यांनी पत्रकारांकडे पक्षाच्यावतीने आपली बाजू मांडली.

सिद्दिकी ऊर्फ सुलेमान खानचा व्हिडिओ व्हायरल झाला. त्यामध्ये आम आदमी पक्षाचे गोव्याचे संयोजक ॲड. अमित पालेकर यांच्यावरच सुलेमान याने व्हिडिओमध्ये नावे घेण्यास सांगितल्याचा आरोप केला आहे. याच विषयावर आमदार व्हेन्झी यांनी प्रश्न उपस्थित केले आहेत. दोन दिवसांपूर्वी जर सुलेमानला अटक झाली असेल तर व्हिडिओ आत्ताच कसा व्हायरल झाला, हा व्हिडिओ माध्यमांपर्यंत कोणी पाठवला, ज्यांनी तो व्हिडिओ पाठवला, त्याला पोलिसांनी आणायला हवे. त्या व्हिडिओमध्ये ज्या तारखा सुलेमान सांगत आहे, त्यात तफावती आहेत. कोणी तरी त्याला स्क्रिप्ट लिहून दिली आहे आणि तो ती वाचत असल्याचेच दिसत असल्याचाही आरोप त्यांनी केला.

व्हिडिओ कोणी काढायला लावला?

व्हिएगस पुढे म्हणाले, या सर्व प्रकरणावरून सरकार काहीही करू शकते, असे दिसून येते. सुलेमान पलायन प्रकरणात जेवढे आहेत, त्यांना चौकशीसाठी का बोलाविले जात नाही. जमीन हडपप्रकरण ॲड. पालेकर यांनी उघड केल्यामुळेच त्यांना त्रास देण्याचा सरकारचा प्रयत्न सुरू आहे. आज पालेकरांना, उद्या आपणास आणि परवा क्रूझ सिल्वा किंवा इतरांनाही सरकार त्रास देऊ शकते. अमित पोलिस स्थानकात आहे आणि त्यामुळेच सुलेमानला कोणी व्हिडिओ काढायला सांगितला काय? असा प्रश्‍नही त्यांनी केला.