Kala Academy Controversy: जागतिक छायाचित्रण दिनानिमित्त आयोजित एका कार्यक्रमात मुख्यमंत्री डॉ. प्रमोद सावंत आणि विरोधी पक्षनेते युरी आलेमाव यांच्या उपस्थितीत, प्रियोळचे आमदार गोविंद गावडे यांनी पत्रकारांवर जोरदार टीका केली. त्यांनी, छायाचित्रकारांनी टिपलेल्या छायाचित्रांचा खरा अर्थ कसा समजून घेतला पाहिजे, यावर भर देत आपले मत मांडले.

कला अकादमीवरून अप्रत्यक्ष टोला

आपल्या भाषणात आमदार गावडे यांनी "एक स्लॅब पडणे आणि संपूर्ण छत कोसळणे यात खूप फरक आहे," असे विधान केले. हे विधान त्यांनी अप्रत्यक्षपणे कला अकादमीच्या नूतनीकरणाच्या वादाकडे निर्देश करत केले. या विधानातून त्यांनी, पत्रकार चुकीची आणि दिशाभूल करणारी माहिती पसरवत असल्याचा आरोप केला. छायाचित्रकाराने आपल्या फोटोमधून जे सांगण्याचा प्रयत्न केला आहे, त्याचा नेमका अर्थ जाणून घेऊन तोच अर्थ लोकांपर्यंत पोहोचवला पाहिजे, असे त्यांचे म्हणणे होते.

माध्यमांवर दोषारोप की जबाबदारीतून पळ?

गोविंद गावडे यांच्या या विधानामुळे आता नवीन प्रश्न निर्माण झाला आहे. कला अकादमीच्या वादाची जबाबदारी स्वीकारण्याऐवजी, ते केवळ माध्यमांवरच दोषारोप करत आहेत का? असा सवाल यानिमित्ताने उपस्थित होत आहे.

त्यांच्या मते, पत्रकारितेचा मूळ उद्देश काहीसा बाजूला सरकत चालला आहे आणि हे योग्य नाही. एका छायाचित्रकाराच्या कलेचा वापर वैयक्तिक स्वार्थासाठी केला जाऊ नये, असेही त्यांनी स्पष्ट केले.