MLA Carlos Ferreira on Government PWD Work

सरकारने बांधलेल्या पुलांसारख्या बांधकामांच्या दुरुस्तीची मोठी कामे टाळण्यासाठी नियमित देखभालीची गरज आहे, असे मत हळदोणाचे आमदार कार्लोस अल्वारेस फेरेरा यांनी व्यक्त केले. काल सोमवारी कारोणा-कालवी पुलाच्या जीर्णोद्धाराच्या उद्घाटनप्रसंगी ते बोलत होते.

हा पूल बांधल्यापासून या पुलाची कोणतीही देखभाल करण्यात आली नव्हती. अशा कामांची नियमित देखभाल व्हायला हवी. तसे झाले नाही तर एकाच वेळी मोठ्या प्रमाणात कामे हाती घेण्याची गरज भासते. पोलादाला गंज चढला असून पुलाचा रंगही फिकट झाला आहे. संपर्क रस्त्यांचीही दुरुस्ती होणे गरजेचे आहे. 59 लाख रुपये खर्चून हे काम हाती घेण्यात येणार आहे, असे फरेरा यांनी सांगितले.

गंज हटविण्याचे काम हाती घेतल्यानंतर रोषणाईचे कामही सुरू करण्यात येईल, असे त्यांनी सांगितले. ते पुढे म्हणाले की, अनेक अपघात झाले असल्याने संपर्क रस्त्यांची दुरुस्ती करण्यात येणार आहे. विकासकामांना मंजुरी मिळत असल्याने आनंद होत आहे. दरम्यान, आणखी कामे नियोजित आहेत. खोर्जुवे पुलाचे कामही हाती घेण्यात येणार आहे. तेही लवकरच होईल.

या कामाला मंजुरी दिल्याबद्दल फेरेरा यांनी मुख्यमंत्री प्रमोद सावंत यांचे आभार मानले. निविदा निकाली काढून वर्क ऑर्डर जारी झाल्याबद्दल मी मुख्यमंत्र्यांचे आभार मानतो. नीलेश काब्राल आता सार्वजनिक बांधकाम मंत्री नसले तरी मी त्यांचे आभार मानतो. त्यांनी आपल्या कार्यकाळात महत्वाची कामे मंजूर केली होती. कामे मार्गी लागावी, यासाठी मी दर आठवड्याला त्यांच्याकडे सातत्याने पाठपुरावा करत होतो. तसेच प्रधान मुख्य अभियंत्यांनी केलेल्या तत्परतेबद्दल मी त्यांचे आभार मानतो, असे फेरेरा म्हणाले.