मडगाव: गेल्या पाच दिवसांपासून बेपत्ता असलेल्या ३१ वर्षीय सनी सुभाष नाईक या तरुणाचा शोध अत्यंत दुर्दैवीरीत्या संपला आहे. मडगाव येथील खारेबांध परिसरात एका झाडाला लटकलेल्या अवस्थेत सनीचा मृतदेह आढळून आला आहे. या घटनेमुळे सिरवडे परिसरात शोककळा पसरली असून, मडगाव पोलिसांनी या प्रकरणी अकस्मात मृत्यूची नोंद केली आहे.

२ फेब्रुवारीपासून होता बेपत्ता 

मिळालेल्या माहितीनुसार, शिरवडे येथील रहिवासी असलेला सनी नाईक हा २ फेब्रुवारी २०२६ पासून बेपत्ता होता. तो घरी न परतल्याने काळजीत पडलेल्या कुटुंबीयांनी सर्वत्र शोध घेतला, मात्र त्याचा काहीही पत्ता लागला नव्हता.

अखेर शनिवारी खारेबांध येथील स्थानिक नागरिकांना झाडाला लटकलेला एक मृतदेह दिसल्यानंतर ही धक्कादायक घटना उघडकीस आली. नागरिकांनी तातडीने पोलिसांना पाचारण केले.

पोलिसांकडून घटनास्थळाचा पंचनामा 

घटनेची माहिती मिळताच मडगाव पोलिसांनी तातडीने घटनास्थळी धाव घेतली. प्राथमिक तपासणीत मृतदेहाची ओळख सनी नाईक म्हणून पटली आहे. पोलिसांनी घटनास्थळाचा पंचनामा केला असून, हा प्राथमिकदृष्ट्या आत्महत्येचा प्रकार असावा असा संशय व्यक्त केला जात आहे. मात्र, त्याच्या मृत्यूचे नेमके कारण अद्याप स्पष्ट झालेले नाही.

पोलिसांनी मृतदेह उत्तरीय तपासणीसाठी (Postmortem) रुग्णालयात पाठवला आहे. या अहवालानंतरच सनीचा मृत्यू नेमका कशामुळे झाला, हे स्पष्ट होईल. सनीने इतके टोकाचे पाऊल का उचलले असावे? की यामागे काही वेगळे कारण आहे? या दिशेने पोलीस आता तपास करत आहेत. तरुण मुलाचा असा संशयास्पद मृत्यू झाल्याने मडगाव शहरात हळहळ व्यक्त केली जात आहे.