Subhash Phaldesai Crime News

केपे: रिवण येथील मिथिल उल्हास देसाई याने फोन करून अभद्र भाषेत माझ्याकडून कोट्यवधी रुपयांची मागणी केली असल्याची तक्रार समाजकल्याण मंत्री सुभाष फळदेसाई यांनी रायबंदर येथील सायबर गुन्हा पोलिस स्थानकात नोंदविली आहे.

मिथिल हा मला आणि माझ्या कुटुंबीयांना सतत मानसिक त्रास देत असून गेल्या चार दिवसांत शंभरपेक्षा जास्त वेळा फोन करून त्याने त्रास दिला असल्याचे फळदेसाई यांनी तक्रारीत म्हटले आहे. मिथिलने आक्षेपार्ह संदेश समाज माध्यमांवर प्रसारित केले आहेत. माझी सामाजिक प्रतिष्ठा मलीन करण्यासाठी अनावश्यक पोस्ट समाज माध्यमांवर अपलोड केल्याने मिथिलवर त्वरित कारवाई करावी, अशी मागणी फळदेसाई यांनी केली आहे.

बेकायदा चिरेखाणप्रकरणी मिथिलवर कारवाई

केपे पोलिसांनी मिथिलला काल (ता. २४) बेकायदा चिरेखाण चालविल्याप्रकरणी अटक केली होती. मिथिलने काही महिन्यांपूर्वी फळदेसाईंना असेच फोन करून त्रास देण्याचा प्रयत्न केला होता. आता पुन्हा मिथिलने त्रास देणे सुरू केले आहे, असे सुभाष फळदेसाई म्हणाले.