Lumpy Skin Disease: देशभरातील गायींना लम्पी रोगाची लागण झाल्याची प्रकरणे गेल्या काही काळात समोर आलेली आहेत. त्यातच आता गोव्यातही लम्पीचा प्रसार व्हायला सुरवात झाली आहे.

गोव्यातील किती गायींना या रोगाची लागण झाली आहे, याची माहिती नुकतीच राज्याचे पशुपालन मंत्री नीळकंठ हळर्णकर यांनी दिली.

मंत्री हळर्णकर म्हणाले की, गोव्यातील ३२ गायींना लम्पी रोगाची लागण झाली आहे. लम्पीची लागण झालेल्या गायींवर उपचार करण्यात येणार आहेत. त्यासाठी अशा गायींना विलगीकरणात ठेवले जाणार आहे. सिकेरीतील गोशाळेजवळ त्यासाठी स्वतंत्र विभाग स्थापन केला गेला आहे.

गोमंतक गोसेवक महासंघ या सिकेरी - डिचोली येथील गोशाळेने लम्पी रोगाने पिडीत गुरांसाठी विशेष विलगीकरण कक्ष तयार केला आहे. या गुरांवर उपचार देखील येथे केले जात आहेत.

ही गोशाळा कमलाकांत तारी चालवत असून त्यांच्या गोशाळेत सुमारे दोन हजार गुरे आहेत. त्याशिवाय त्यांनी आणखी एक गोशाळा सुरू केली आहे. येथे लंपी पिडीत गुरांवर उपचार केला जातो. सरकारकडून गोशाळेला शक्य तेवढी मदत केली जात आहे, असे हळर्णकर यांनी सांगितले.

दरम्यान, सोमवारी मंत्री हळर्णकर यांनी म्हटले होते की, लम्पीची प्रकरणे राज्यात आढळली असून पशुसंवर्धन खात्याकडून सावधगिरी बाळगण्यात येत आहे. लम्पी रोगाने पीडित गुरे आढळल्यास त्यांची सूचना खात्याला द्यावी, असे आवाहन करण्यात आले आहे.

आपत्कालीन सेवा देण्यासाठी पशुसंवर्धन खात्याने डॉक्टर्स नेमले आहेत. परंतु शेतकऱ्यांनी त्यांची जनावरे आजारी असल्याबाबतचे फोन कॉल करूनही ते टाळले जात असल्याच्या तक्रारी केल्या आहेत. त्यामुळे शेतकऱ्यांना नाइलाजाने गुरांना गोवा डेअरीमध्ये घेऊन जाण्याची पाळी आली आहे.

त्यामुळे या पुढे फोन कॉल चुकवल्यास सुरुवातीला दोन वेळा ताकीद दिली जाईल आणि तिसऱ्यांदा कायदेशीर कारवाई केली जाणार आहे, असे हळर्णकर यांनी सांगितले.