मडगाव : क्रीडामंत्री गोविंद गावडे यांनी क्रिडा खात्याची सुत्रे हातात घेतल्याबरोबर धडाकेबाज सुरुवात केली आहे. क्रीडा खात्यातील कामचुकार कर्मचाऱ्यांवर कडक कारवाई केली जाईल असे त्यांनी याआधीच स्पष्ट केले आहे. आज पहाटे फातोर्डा स्टेडियमवर भेट देत गोविंद गावडेंनी अधिकाऱ्यांचा धक्काच दिला आहे.

गोव्याचे क्रीडामंत्री गोविंद गावडे (Govind Gaude) यांनी आज मंगळवारी सकाळी 6 वाजता फातोर्डा स्टेडियमची पाहणी केली आणि तेथील अधिकाऱ्यांना कडक शब्दांमध्ये खडे बोल सुनावले.आज त्यांनी इनडोअर स्टेडियम, जिम, जलतरण तलावासह परिसराची पाहणी केली. हल्लीच वादळी वाऱ्यामुळे स्टेडियमवरील पत्रे खाली पडले होते. त्याची पण पाहणी केली आणि दुरुस्तीचे आदेश दिले.

दरम्यान प्रशिक्षक (Coach) आणि कर्मचाऱ्यांचा कामचुकारपणा पाहून गोविंद गावडे चांगलेच संतापले. सर्व कर्मचाऱ्यांनी आणि प्रशिक्षकांनी वेळेवर कामावर येणे गरजेचे आहे असे सांगत जलतरण तलावाची दुरुस्ती लवकरच सुरु केली जाईल असेही त्यांनी सांगितले. फातोर्डा (Fatorda) स्टेडियम परिसर आणि मैदानावरील कचरा पाहून क्रीडामंत्री भडकले. त्यांनी 48 तासांमध्ये हा परिसर स्वच्छ करण्याचे आदेश स्टेडियम व्यवस्थापकाना दिले आहेत.