Tillari Ghat Accident

पणजी: कर्नाटकातून गोव्याच्या दिशेने येणारी मिनी बस आज सकाळी जुन्या अपघातग्रस्त ट्रकवर आदळली. तिलारी घाटातील जयकर पॉईंट येथील अवघड वळणावर चालकाचे नियंत्रण सुटल्याने अपघात झाला. बस धडकून तेथेच थांबल्याने मोठा अनर्थ टळला.

बेळगाव येथील काहीजण मिनी बसने तिलारीमार्गे गोव्यात पर्यटनासाठी येत होते. तिलारी घाट उतरत असताना जयकर पॉईंट येथील अवघड वळणावर चालकाचे गाडीवरील नियंत्रण सुटले. याच ठिकाणी काही महिन्यांपूर्वी अपघातग्रस्त झालेला ट्रक रस्त्याकडेला उभा आहे.

हा ट्रक नेमका ज्या दिशेने दरी आहे, तेथील तुटलेल्या संरक्षक कठड्याला लागून स्थिरावला आहे. या उभ्या असलेल्या ट्रकला मिनी बस जाऊन आदळली. त्यामुळे बस खोल दरीत कोसळण्यापासून बचावली. अपघातग्रस्त ट्रक नसता तर मोठा अनर्थ घडला असता. बसमध्ये सुमारे २० प्रवासी होते.