Mulgao Mining Updates

डिचोली: ‘खनिज’ वाहतुकीवरून मुळगाव गावात निर्माण झालेला गुंता सोडविण्यासाठी प्रशासकीय पातळीवरून प्रयत्न सुरू असून, येत्या शुक्रवारी (ता. २१) रोजी प्रशासनातर्फे मुळगावमधील खाणीची पाहणी करण्यात येणार आहे.

आज (सोमवारी) डिचोलीत झालेल्या एका संयुक्त बैठकीत सर्वानुमते तसा निर्णय झाल्याची माहिती मिळाली आहे. उपजिल्हाधिकारी कार्यालयात आज एक महत्वाची बैठक झाली. नवनियुक्त उपजिल्हाधिकारी खोर्जुवेकर यांच्यासह ‘वेदांता’चे अधिकारी तसेच मुळगाव पंचायत मंडळासह देवस्थान, शेती, कोमुनिदाद चे पदाधिकारी उपस्थित होते.

आधी गावचे प्रश्‍न सोडवा!

खनिज व्यवसायाला आमचा विरोध नाही, अगोदर गावचे प्रश्न सोडवा, नंतरच खाणीचा विचार कर, अशी मुळगावच्या लोकांची मागणी आहे. मुळगावमधील मंदिरांसह घरेदारे, शेती-बागायती, तळी आणि अन्य नैसर्गिक जलसंपदा खाण लीज क्षेत्रातून बाहेर काढा. नैसर्गिक वैभव जपून गावचे अस्तित्व सांभाळा. शेतकऱ्यांचे प्रलंबित प्रश्‍न सोडवा.