पणजी: कळंगुटचे आमदार तथा ग्रामीण विकास मंत्री मायकल लोबो यांनी आज अखेर आपले नाराजीनाट्य संपवत आमदारकीचा व मंत्रिपदाचा राजीनामा दिला. लोबो भाजपला सोडचिठ्ठी देणार का? या प्रलंबित प्रश्नाला आज अखेरीस पूर्णविराम लागला. मुख्यमंत्री कार्यालयात आपला राजीनामा देऊन बाहेर आल्यानंतर त्यांनी पत्रकारांशी संवाद साधला. (Michael Lobo resigns from BJP, likely to join Congress)

ते म्हणाले, "मी मंत्रिपदाचा राजीनामा दिला आहे. मी आशा करतो की कळंगुट येथील लोकं माझ्या निर्णयाचा आदर करतील व भविष्यात मला साथ देतील." तुम्ही काँग्रेस (Congress) पक्षामध्ये सामील होणार का हे विचारले असता लोबो यांनी स्पष्ट उत्तर देण्याचे टाळले. ते म्हणाले, "मी अजून कुठलाही निर्णय घेयलेला नाही. काही राजकीय पक्षांबरोबर माझे बोलणे सुरू आहे. मी ज्या पक्षात जाईन तेथील उमेदवार कसे निवडून आणता येतील याकडे लक्ष केंद्रित करेन."

दरम्यान, मायकल लोबो (Michael Lobo) हे केदार नाईक यांच्या प्रचारात सामील झाले होते. यावर स्पष्टीकरण देताना ते म्हणाले, "केदार नाईक माझा चांगला मित्र आहे म्हणून मी त्याच्या प्रचारात सहभागी झालो." लोबो यांनी कुठल्याही नेत्याचे नाव न घेता भाजपवर (BJP) टीका केली.