कतारमध्ये सध्या फिफा फुटबॉल वर्ल्डकप 2022 (Fifa Football Worldcup 2022) सुरू आहे. बुधवारी ग्रुप सी मधील पोलंड विरुद्ध अर्जेंटिना सामना झाला. स्टेडियम 974 येथे झालेल्या या सामन्यात अर्जेंटिनाने 2-0 असा विजय मिळवला. या सामन्याला गोव्याचे भाजप आमदार मायकल लोबो (Michael Lobo) यांनी हजेरी लावली. सामन्यानंतर लोबोंनी 974 स्टेडियमचे कौतुक केले. यावरून गोवा फॉरवर्डचे आमदार विजय (Vijai Sardesai) सरदेसाईंनी लोबो यांनी चिमटा काढला आहे.

झाले असे की पोलंड विरुद्ध अर्जेंटिनाचा सामना 974 स्टेडियममध्ये झाला. सामन्यासाठी मायकल लोबो यांनी सप्तनीक हजेरी लावली. त्यानंतर त्यांनी मैदानाच्या बाहेरून जोडीने फोटो काढला. हे फोटो ट्विट करत लोबो यांनी 974 स्टेडियमचे वैशिष्ट्य सांगितले.

"974 स्टेडियम वास्तुशास्त्राचा चमत्कार आहे. हे स्टेडियम 974 रिसायकल शिपिंग कंटेनरपासून बनवले आहे. स्टेडियम पूर्णपणे खोलून दुसऱ्या ठिकाणी स्थलांतरित केले जाऊ शकते. यामुळे हे एक जगातील सर्वात टिकाऊ स्टेडियम आहे." असे ट्विट मायकल लोबो यांनी केले आहे.

लोबो यांच्या ट्विटला आमदार विजय सरदेसाई यांनी रिप्लाई दिला आहे. "स्टेडियमपेक्षा अर्जेंटिना संघाच्या खेळाचा उल्लेख म्हत्वाचा होता. शाहजाहनला जे शक्य होतं त्यानं केलं, हे कतार मॉडेल त्याच्या निविदा प्रक्रियेसाठी ग्राह्य देखील धरले जाणार नाही. आणि तुमच्या सरकारकडे नव्या गोष्टींसाठी पैसा आहे?" असे ट्विट आमदार विजय सरदेसाई यांनी केले आहे.

आमदार विजय सरदेसाई यांनी कला अकादमीच्या कामात भ्रष्टाचार झाल्याचा आरोप अनेकवेळा केला आहे. या कामासाठी निविदा प्रक्रिया का राबविण्यात आली नाही? असा प्रश्न त्यांनी वारंवार उपस्थित केला आहे. दरम्यान, विजय सरदेसाई यांनी पुन्हा एकदा काँग्रेसमधून नुकतेच भाजपमध्ये गेलेल्या मायकल लोबो यांच्यावर देखील निशाना साधला आहे. विजय सरदेसाई यांच्या ट्विटनंतर लोबो यांनी मात्र कोणताही रिप्लाई दिलेला नाही.