म्हादई वन्यजीव अभयारण्यात प्रवेशबंदी असतानाही धबधब्याला भेट दिल्याप्रकरणी वन विभागाने गुरुवारी कर्नाटकातील २९ जणांना ताब्यात घेतले. ही घटना सुर्ला गावाजवळील जाळवणी धबधब्याच्या परिसरात घडली.

स्थानिक नागरिकांनी प्रतिबंधित भागात काही लोक गेल्याची माहिती दिल्यानंतर वन विभागाच्या पथकाने तातडीने घटनास्थळी धाव घेतली. तपासादरम्यान कर्नाटकातील बेळगाव व आसपासच्या भागातील २९ जण धबधब्याजवळ आढळून आले. चौकशीत त्यांच्याकडे प्रतिबंधित क्षेत्रात प्रवेशाची कोणतीही परवानगी नसल्याचे स्पष्ट झाले.

सर्वांना चौकशीसाठी वाळपई येथील वन कार्यालयात आणण्यात आले. ताब्यात घेतलेल्या व्यक्तींमध्ये अनेक विद्यार्थी असल्याचे वन अधिकाऱ्यांनी सांगितले. जबाब नोंदवताना काहींनी खोटी नावे सांगितल्यामुळे प्रक्रिया उशिरा पूर्ण झाली. अखेर रात्री उशिरा त्यांची वैयक्तिक जातमुचलक्यावर सुटका करण्यात आली. मात्र पुन्हा अशा प्रकारे नियमांचे उल्लंघन केल्यास कठोर कारवाईचा इशारा देण्यात आला.

म्हादई वन्यजीव अभयारण्याचे रेंज अधिकारी गिरीश बैलुडकर यांनी सांगितले की, जाळवणी धबधबा पर्यटकांसाठी पूर्णपणे बंद आहे. धोकादायक मार्ग, दाट जंगल आणि वन्यप्राण्यांची वर्दळ यामुळे हा परिसर अतिशय जोखमीचा मानला जातो. मागील वर्षी येथे दोन जणांचा बुडून मृत्यू झाला होता आणि मृतदेह बाहेर काढण्यासाठी दोन दिवस लागले होते.

दरम्यान, सोशल मीडियावर व्हायरल होणारे फोटो व व्हिडिओ पाहून अनेकजण धबधब्याकडे आकर्षित होत असल्याचे वन अधिकाऱ्यांनी नमूद केले. नियमांचे उल्लंघन करणाऱ्यांवर भविष्यात कडक कारवाई करण्यात येईल, असा इशाराही त्यांनी दिला.