Yuri Alemao About Mhadei River

पणजी: म्हादईची पाहणी करण्यासाठी आपण कर्नाटकच्या सभापतींकडून परवानगी मागू शकत नाही, असे सभापती रमेश तवडकर यांनी स्पष्ट केले आहे. तवडकरांच्या स्पष्टीकरणावर विरोधी पक्षनेते युरी आलेमाव यांनी टीका केली आहे. त्यांनी भाजप सरकार म्हादईच्या पाणीप्रश्नावर वेळ वाया घालवत असल्याचे म्हटले आहे.

युरी यांनी प्रसिद्धीस दिलेल्या पत्रकात म्हटले आहे की, सभापतींच्या वक्तव्यामुळे भाजप सरकार अकार्यक्षम असल्याचे स्पष्ट झाले आहे. राज्याची जीवनवाहिनी असलेल्या म्हादईप्रश्नाची सरकारला काहीच फिकीर नाही. जलस्रोतमंत्री सुभाष शिरोडकर यांनी ८ जानेवारी रोजी सभागृह समितीची दुसरी बैठक घेतल्यानंतर सभापतींना कर्नाटकातील आपल्या समकक्षांना पत्र लिहून म्हादई पाहणीसाठी मंजुरी घेण्याची विनंती करू असे म्हटले होते.

या विधानाची आठवण करून देताना युरी म्हणाले, सध्या सभापतींनी जी भूमिका घेतली आहे ती पाहता भाजप सरकारचा खरा चेहरा समोर आला आहे. म्हादईचे पाणी वळविण्याच्या कर्नाटकच्या प्रयत्नांवर पर्यावरणप्रेमी आणि गोमंतकीयांनी चिंता व्यक्त केली आहे, पण आश्चर्याची बाब म्हणजे भाजप सरकारला कर्नाटकच्या कारवायांची फिकीर नाही, असेही युरींनी म्हटले आहे.

‘विलंब करण्यासाठी डावपेच’

सभागृह समितीकडून आपल्याला कोणतेही पत्र आले नसल्याचे तवडकर यांनी प्रसार माध्यमांना सांगितले. म्हादई वादाच्या प्रकरणात आपली कोणतीही भूमिका नसल्याचे त्यांनी स्पष्ट केले आहे. याचा अर्थ भाजप सरकार पूर्णपणे वेळकाढूपणा करीत आहे. म्हादई वाचवण्याच्या प्रक्रियेला विलंब करण्यासाठीच अनेक डावपेच अवलंबले जात आहेत, असा आरोप युरी आलेमाव यांनी केला आहे.