फोंडा: मगो पक्ष आणि भारतीय जनता पक्षाच्या युतीमुळे फोंड्यातून भाजपचे उमेदवार रितेश रवी नाईक हे निश्‍चितच निवडून येणार असून कुणीही अफवांवर विश्‍वास ठेवू नये, आता केवळ आठ महिने मिळत असले तरी विकासकामाच्या बळावर पुढील २०२७ च्या निवडणुकीतही रितेश नाईक यांनाच उमेदवारी मिळाली पाहिजे, मगो पक्षाच्या रितेश नाईक यांना पूर्ण पाठिंबा आहे, असे मगो पक्षाचे अध्यक्ष अध्यक्ष दीपक ढवळीकर यांनी जाहीर केले.

फोंड्यातील या पत्रकार परिषदेला भाजपाचे अध्यक्ष दामू नाईक, फोंडा नगराध्यक्ष विरेंद्र ढवळीकर, भाजपा मंडळ अध्यक्ष हरेश नाईक, सरपंच नावेद तहसीलकर, नगरसेवक विश्‍वनाथ दळवी, रॉय नाईक व उपसरपंच साजिदा सय्यद आदी उपस्थित होत्या.

दीपक ढवळीकर म्हणाले की, भाजपाचे फोंड्यातील उमेदवार हे उच्च शिक्षित असून नम्रपणा हा त्यांचा स्थायीभाव आहे, प्रामाणिकपणाच्या आणि भाजप मगो युतीच्या बळावर रितेश नाईक बहुमताने निवडून येईल, असा विश्‍वास व्यक्त करताना काँग्रेसचा उमेदवार काँग्रेसच पाडील, असे त्यांनी स्पष्ट केले.

विश्‍वनाथ दळवी म्हणाले, रितेश नाईक यांच्या पाठीशी भाजप कार्यकर्ते खंबीरपणे उभे असून प्रचंड मतांनी रितेश नाईक निश्‍चितच निवडून येतील, असा विश्‍वास त्यांनी व्यक्त केला. दामू नाईक म्हणाले, फोंडा मतदारसंघात भाजप आणि मगो युतीने जोरदार प्रचार केला असून प्रत्येक ठिकाणी रितेश नाईक यांना प्रचंड प्रतिसाद मिळाला आहे. फोंड्यातील विकासकामांच्या पूर्ततेसाठी रितेश नाईक यांना फोंडेकरांनी प्रचंड मतांनी निवडून द्यावे आणि आपली कामे करून घ्यावी.