पणजी: येत्या २०२७ च्या मंत्रिमंडळात सुदिन ढवळीकर किंवा मगोचा एकही आमदार नसेल, असे विधान करणाऱ्या गोवा फॉरवर्डचे आमदार विजय सरदेसाई यांचा मडकई मतदारसंघातील मगो पक्षाच्या विद्यमान आणि माजी जिल्हा पंंचयात सदस्य, बांदोडा सरपंचांनी निषेध केला. दरम्यान, निवडून येणाऱ्या ४० आमदारांत कोण असेल किंवा नसेल, ते ठरविण्याचा अधिकार जनतेला आहे, असेही त्यांनी सांगितले.

‘मगो’च्या येथील कार्यालयात झालेल्या पत्रकार परिषदेस सरपंच रामचंद्र नाईक, जिल्हा पंचायत सदस्य गणपत नाईक, प्रिया च्यारी आणि दामोदर नाईक, कार्यकारी अध्यक्ष प्रताप फडते, खजिनदार अनंत नाईक, विशांत नाईक आदींची उपस्थिती होती.

सरपंच नाईक म्हणाले, सुदिन ढवळीकर यांचा मंत्रिमंडळात कधीच समावेश होणार नाही, या सरदेसाईंच्या वक्तव्याची मडकई मतदारसंघातील मगो पक्षाच्या विद्यमान आणि माजी झेडपी सदस्य निषेध करीत आहोत.

हे विधान केवळ राजकीय विरोधातून केले गेले असून, याला कोणताही वस्तुनिष्ठ आधार नाही. ढवळीकर यांनी राज्याच्या पायाभूत सुविधांच्या विकासासाठी भरीव योगदान दिले आहे, असे मगो नेत्यांनी पत्रकार परिषदेत सांगितले.

राजकीय वाद असू शकतो, परंतु सार्वजनिकरित्या एका ज्येष्ठ नेत्याचा अपमान करणे ही धक्कादायक बाब आहे. सरदेसाईंनी तत्काळ माफी मागावी,अशी मागणीही मगो नेत्यांनी केली आहे. पांडुरंग राऊत अध्यक्ष असताना कार्यकारिणीने घटनेत म्हटले आहे की, पहिल्यांदा निवडून आलेल्या आमदाराने मंत्रिपद स्वीकारू नये. सुदिन ढवळीकर हे कार्यकारिणी सदस्य नाहीत, ते केवळ कार्यकर्ते आहेत.

आरोलकरांना मंत्री केल्यास स्वागतच!

मांद्रेचे आमदार जीत आरोलकर हे चांगले काम करीत आहेत. पक्षाच्या अध्यक्षांनीही त्यांच्या कामाचे कौतुक केले आहे. प्रथम आमदार बनलेल्यांना मंत्री करू नये, असा कार्यकारिणीचा निर्णय आहे. परंतु आरोलकर यांना मुख्यमंत्र्यांनी स्वतः आरोलकर यांना मंत्रिमंडळात घेतले, तर त्या निर्णयाचे आम्ही स्वागत करतो, असे खजिनदार नाईक यांनी स्पष्ट केले.