डिचोली: गेल्या काही वर्षांपासून वादाच्या विळख्यात अडकलेला मयेतील श्री माया केळबाय देवस्थानचा कळसोत्सव यंदा निलंबित करण्यात आला. विशेष म्हणजे, देवस्थान समिती आणि अन्य गटांमध्ये एकवाक्यता झाल्याने गेल्या वर्षी कळसोत्सव निर्विघ्नपणे साजरा झाला होता.

शनिवारी सायंकाळी उशिरापर्यंत कळसोत्सव साजरा करण्याबाबत देवस्थान समिती आणि अन्य समाजातील गटांमध्ये एकमत झाले नाही. परिणामी कायदा व सुव्यवस्थेचा प्रश्न निर्माण होऊ नये, यासाठी कळसोत्सव निलंबित करण्याचा निर्णय प्रशासने घेतला. तसा आदेशही उपजिल्हाधिकारी शुभम नाईक यांनी सायंकाळी जारी केला.

कळसोत्सव निलंबित केल्याने या देवस्थानची प्रसिद्ध माल्याची आणि रेड्याची जत्रा अडचणीत आली आहे. मान व अधिकाराच्या मुद्यावरून मयेतील कळसोत्सव मागील काही वर्षांपासून वादाच्या विळख्यात अडकला आहे. तरीदेखील देवस्थान समिती आणि अन्य गटांमध्ये एकवाक्यता झाल्याने गेल्या वर्षी कळसोत्सव निर्विघ्नपणे साजरा झाला होता. त्यामुळे यंदाही कळसोत्सव होणार, अशी भाविकांना आशा होती. मात्र, हा उत्सव निलंबित केल्याने भाविकांच्या उत्साहावर विरजण पडले आहे. देवीच्या कळसाचे घरोघरी आगमन कधी होणार, या प्रतीक्षेत असलेल्या भाविकांची घोर निराशा झाली आहे.

उपजिल्हाधिकारी शुभम नाईक, मामलेदार शैलेंद्र देसाई यांच्यासह अन्य अधिकारी दुपारपासूनच मंदिरात उपस्थित होते. यावेळी मोठा पोलिस फौजफाटा तैनात केला होता. पोलिस उपअधीक्षक श्रीदेवी बी.व्ही. आणि पोलिस निरीक्षक विजय राणे हेही यावेळी उपस्थित होते.

गेल्या वर्षीप्रमाणे यंदाही कळसोत्सव व्हावा, यासाठी काल (ता. २०) तीनवेळा प्रशासकीय पातळीवर देवस्थान समिती आणि अन्य गटांची बैठक झाली. या बैठकीस आमदार प्रेमेंद्र शेट हेही उपस्थित होते.

त्यांनीही शिष्टाई करून तोडगा काढण्यासाठी केलेले प्रयत्न अयशस्वी ठरले. देवस्थान समिती, नाईक, कारबोटकर आणि अन्य गटांचे प्रस्ताव एकमेकांना मान्य झाले नव्हते, अशी माहिती उपलब्ध झाली. बैठकीत सुवर्णमध्य निघाला नाही. त्यामुळे यंदा कळसोत्सव अनिश्चिततेच्या सावटाखाली असल्याचे संकेत मिळाले होते.