वास्को: पावसाळ्यात कोठे पाणी साचले, कोठे वाहतुकीची कोंडी झाली आहे, किती विक्रेत्यांकडे परवाने आहेत, किती नवीन बांधकामे आली आहेत, याबाबत माहिती एका क्लिकवर मिळणार आहे. यासंबंधी मुरगाव पालिका मंडळाच्या बैठकीत चित्रगुप्त अर्बन टेक्नालॉजीजच्या अधिकाऱ्यांनी योग्य ती माहिती उपस्थितांना दिली. याप्रसंगी उपस्थित असलेल्या काही नगरसेवक, नगरसेविकांनी विचारलेल्या प्रश्नांना त्यांनी समर्पक उत्तरे दिली.

चित्रगुप्त अर्बन टेक्नालॉजी ही डेटा कंपनी आहे. जी शहरी राहणीमान व प्रशासनात क्रांती घडवून आणण्यासाठी डेटा वापरण्यावर लक्ष केंद्रित करीत आहे. कंपनी दृष्टी, ऑडिओ, इतर सेन्सर्सद्वारे निरनिराळे भागांचे निरीक्षण करता येते. यासंबंधी नमन पैठणकर यांनी पीपीटीद्वारे सविस्तर माहिती दिली.

यावेळी नगराध्यक्ष गिरिष बोरकर, मुख्याधिकारी सिध्दीविनायक नाईक, नगरसेवक दामोदर कासकर, नारायण बोरकर, नगरसेविका देविका आरोलकर, इतर नगरसेविका तसेच पालिका अधिकारी व इतर उपस्थित होते.

चित्रगुप्त अर्बन टेक्नालॉजीजने तयार केलेल्या अ‍ॅपमुळे कोणती माहिती उपयुक्त माहिती मिळते, तिचे कार्य कसे चालते, त्यामुळे शहर भागातील विविध समस्यांची उकल कशी करता येईल, यासंबंधी त्यांनी माहिती दिली. सदर अ‍ॅपद्वारा विविध डेटा मिळविता येतो.

काही वर्षापूर्वी एखाद्या ठिकाणची घरे कोणत्या पध्दतीची होती. विद्यमान स्थितीत त्यांच्यामध्ये कोणता बदल व कोणते नूतनीकरण करण्यात आले यासंबंधीची माहिती पालिकेला मिळू शकेल.

एखाद्या विक्रेत्याने व्यवसाय सुरु केला, तथापि त्याने योग्य सोपस्कार पार पाडले की नाही, एका दुकानाच्या जागी आणखी किती दुकाने तयार झाली आहे, यासंबंधीची माहिती उपलब्ध होऊ शकेल. कोठे कचरा जमा झाला आहे, याची माहिती पालिकेला मिळणार आहे. त्यामुळे पालिकेला तेथे योग्य ती उपाययोजना करता येईल.