आके-मडगाव येथील चार प्रभाग कचरामुक्त करण्याची घोषणा नगराध्यक्ष दामोदर शिरोडकर यानी आज केली. त्यांनी सांगितले की, विद्यानगर सरकारी शाळा, सेंट जोसेफ, टी. बी. कुन्हा तसेच इतर शाळांतील विद्यार्थ्यांचे गट तयार करून ही मोहीम राबवली जाईल व पुढील महिन्यापासून ती सुरू होईल.

संपूर्ण मडगाव शहर कचरामुक्त व्हावे अशी आमची इच्छा आहे. सुरूवात आम्ही आकेपासून करीत आहोत असे सांगून शिरोडकर म्हणाले की, कचरा उचलणे सोपे पण तो नेऊन टाकावा कुठे हा प्रश्‍‍न सर्वांसमोर आहे. त्यामुळे प्रत्येक नागरिकाने आपला परिसर स्वच्छ राखण्यासाठी प्रयत्न करणे व त्या दृष्टीने जागृती करणे गरजेचे आहे. ही मोहीम नगरपालिकेच्या खर्चातून राबवली जाणार नाही, असेही त्यांनी स्पष्ट केले.

गोमंतक भंडारी समाजच्या युवा समितीने आज रविवारी समाजाच्या सभागृह परिसरात वनमहोत्सवाचे आयोजन केले होते. त्‍यावेळी प्रमुख पाहुणे म्हणून नगराध्यक्ष दामोदर शिरोडकर उपस्थित होते. दादी मयेकर यांनी झाडांचे महत्त्‍व सांगितले. सुनील कृ. नाईक यांनीही विचार व्यक्त केले. वनमहोत्सवाला अमर शिरोडकर, वासुदेव विर्डीकर, नगरसेवक सिद्धांत गडेकर, नर्मदा कुंडईकर, युवाध्यक्ष निखिल बोरकर आदी मान्यवर उपस्थित होते.