Margao News: मडगावच्या उपनगराध्यक्ष दीपाली सावळ यांनी पदाचा दिलेला राजीनामा पालिका संचालनालयाने स्वीकारला असून नव्या उपनगराध्यक्षांची निवडणूक मंगळवार 13 रोजी सकाळी 11 वाजता निश्र्चित केली आहे.

सासष्टीचे उपजिल्हाधिकारी रमेश गावकर यांची निर्वाचन अधिकारी म्हणून नियुक्ती करण्यात आलेली आहे. उपनगराध्यक्षपदाची निवडणूक लढविण्याची इच्छा असलेल्या नगरसेवकांनी 12 फेब्रुवारी दुपारपूर्वी मुख्याधिकारी गौरीश शंखवाळकर यांच्या कार्यालयात नावे द्यावीत, असे सूचित करण्यात आले आहे.

दरम्यान, सत्ताधारी भाजपचे 16, गोवा फॉरवर्डचे 8 व एक अपक्ष नगरसेवक आहे. त्यामुळे सत्ताधारी भाजपच्याच गटातील उपनगराध्यक्षपदावर आरूढ होईल, हे निश्‍चित वाटत असले तरी सत्ताधारी गटाच्या नगरसेवकांत नेमके कुणाला पद द्यावे, याबद्दल नगरसेवकांमध्ये मतभेद असल्याचे सूत्रांकडून समजते.

फातोर्ड्याच्या नगरसेविका बबिता नाईक यांचे नाव सर्वांत पुढे आहे व बहुतेक नगरसेवकांचे समर्थन त्यांना मिळेल, असे वाटते. एसटी समाजातील एक- दोन नगरसेवकही या पदासाठी इच्छुक असल्याचे कळते.