Goa Carnival: देशात केवळ गोव्यातच कार्निव्हलसारखा महोत्‍सव आयोजित केल्या जातो. त्यामुळे देश-विदेशातील लोक हा उत्सव पाहण्यासाठी गोव्यात येत असतात. यंदाही पर्यटकांनी मोठ्या प्रमाणात गर्दी केली.
‘खा, प्या, आणि मजा करा’ असा संदेश ‘किंग मोमो’ देत असतो. त्यामुळे नागरिकांमध्‍ये प्रचंड उत्साह आणि नवी उमेद निर्माण होते. हा महोत्‍सव सामाजिक सलोखा जपतो, असे प्रतिपादन मुख्यमंत्री डॉ. प्रमोद सावंत यांनी केले. आज शनिवारी संध्याकाळी सव्वाचारच्या सुमारास येथील जुन्या सचिवालयाकडून कार्निव्हल मिरवणुकीस प्रारंभ झाला. त्‍यानंतर मुख्यमंत्री बोलत होते.
यावेळी पर्यटनमंत्री रोहन खंवटे, आमदार जेनिफर मोन्सेरात, महापौर रोहित मोन्सेरात यांची उपस्थिती होती. मुख्यमंत्र्यांनी बावटा उंचावून मिरवणुकीला प्रारंभ केला आणि राज्‍यात किंग मोमोची राजवट सुरू झाली. रात्री 9 पूर्वी मिरवणूक विसर्जित झाली.
‘खा, प्या, मजा करा, पण आरोग्याची काळजी घ्या’, ‘व्यायामाने शरीर सुदृढ करा’, ‘दारू पिऊन वाहन चालवू नका’, ‘प्रदूषण टाळा, आपला वारसा सांभाळा’ असे सामाजिक संदेश देणाऱ्या चित्ररथांनी लक्ष वेधून घेतले.
नाच-गाण्यांच्या तालावर राजधानी दुमदुमून निघाली होती. मिरवणुकीच्या सुरूवातीला किंग मोमोने रथातून हात उंचावून रस्त्याच्या दुतर्फा जमलेल्या हजारो लोकांना शुभेच्छा दिल्‍या. मिरवणुकीत परदेशी पर्यटक उस्फूर्त नाचत होते. पोर्तुगाल येथील पर्यटकांचा एक गट रंगीबेरंगी वेशभूषा करून नाचून सगळ्यांचे लक्ष वेधून घेत होता.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
