सासष्टी: मडगाव नगरपालिकेला पूर्णवेळ मुख्याधिकारी पाहिजे या मताचा मीसुद्धा आहे, पण सध्या समाजकल्याण खात्याचे संचालक अजित पंचवाडकर यांच्याकडे अतिरिक्त ताबा दिला आहे व तो तात्पुरता आहे.

जेव्हा सरकारी अधिकाऱ्यांच्या सर्वसाधारण बदल्या होणार आहेत, तेव्हा मडगावला पूर्णवेळ मुख्याधिकारी नियुक्ती होईल असे मडगावचे आमदार दिगंबर कामत यांनी आज पत्रकारांना सांगितले.

लोकांची कामे पूर्ण होण्यास दिरंगाई होत असते, लोकांची प्रकरणांवरील सुनावणी पुढे ढकलावी लागते. त्यामुळे लोकांना त्रास होत असतो याची जाणीव आपल्याला आहे. तरीसुद्धा अतिरिक्त ताबा घेतलेले मुख्याधिकारी पंचवा़डकर अनुभवी आहेत.

ते पूर्वी इथे मुख्याधिकारी म्हणून होते. त्यांनी एकाच दिवसात १९८ फाईल हातावेगळ्या केल्या अशी माहिती कामत यांनी दिली.

नगराध्यक्ष दामोदर शिरोडकर यांनी सांगितले, की माजी मुख्याधिकारी गौरीश शंखवाळकर यांनी जवळ जवळ ९०० हून अधिक फाईल प्रलंबित ठेवल्या आहेत.