मडगाव: गोव्यातील अनेक महत्वाच्या नेत्यांमध्ये गणल्या जाणाऱ्यांपैकी एक नाव म्हणजे माजी मुख्यमंत्री आणि मडगावचे आमदार दिगंबर कामत. दिगंबर कामत यांनी पक्षाच्या कार्यकर्त्यांना सोशल मीडिया वापरताना सावधगिरी बाळगण्याचा इशारा दिला आहे. त्यांनी सर्वांना केवळ पंतप्रधान नरेंद्र मोदी, गृहमंत्री अमित शहा आणि पक्षाध्यक्ष जे पी नड्डा यांच्यासह सत्ताधारी पक्षाच्या नेत्यांचे पोस्ट लाईक करण्याचा सल्ला दिलाय.

माजी मुख्यमंत्री म्हणालेत की कार्यकर्ते कुठल्या पक्षच्या नेत्यांचे पोस्ट लाईक करतायत पक्ष यावर लक्ष ठेऊन आहे. कार्यकर्त्यांच्या क्रियाकलापांवर लक्ष ठेवण्यासाठी ते एक विशेष यंत्रणा वापरतायत. आत्ताच्या घडीला कितीही विरोध झाला तरीही भारतीय जनता पक्षाला कोणीही त्यांच्या पदावरून हलवू शकणार नाहीये असेही कामत यांनी नमूद केले.

माजी मुख्यमंत्री दिगंबर कामत यांनी कार्यकर्त्यांना पक्ष किंवा पक्षाच्या नेत्यांवर टीका करणारे सोशल मीडिया संदेश पाठवू नयेत याउलट पक्षाचा संदेश आणि मोहिमांचा प्रचार करण्यावर लक्ष केंद्रित केले पाहिजे असा संदेश दिला आहे.

कामत यांनी नवनिर्वाचित मडगाव मंडळाचे अध्यक्ष अभिषेक काकोडकर यांनाही पाठिंबा दर्शवला आणि मडगावने सतत उत्तम कामगिरी बजावत राहावी असे आवाहन केले आणि सोबत मंडळाच्या बैठका आणि कार्यक्रमांमध्ये कोणीही टाळाटाळ केल्यास ते खपवून घेणार नाही असा इशाराही दिला.