Ration Card Applications :

मडगाव, सरकारी अधिकाऱ्यांकडे सातत्याने पाठपुरावा केल्यानंतर, भाजप सरकारने अखेर शिधापत्रिकांशी संबंधित ऑफलाइन अर्ज स्वीकारण्यासाठी सूचना जारी केल्या.

नागरी पुरवठा विभागाचे ऑनलाइन पोर्टल कोलमडल्यामुळे अडचणींचा सामना करणाऱ्या सामान्य लोकांना मोठा दिलासा मिळाला आहे, असे केपेचे आमदार एल्टन डिकॉस्ता यांनी म्हटले आहे.

लोकांना शिधापत्रिका लाभार्थ्यांचे हस्तांतरण, तसेच निलंबित शिधापत्रिकांसंबंधी अर्ज सादर करताना सरकारच्या कोलमडलेल्या इंटरनेट नेटवर्क व नागरी पुरवठा खात्याची बंद असलेली पोर्टल यामुळे प्रचंड अडचणी आल्या, असे डिकॉस्ता म्हणाले.

सरकारने लोकांप्रती संवेदनशील राहून जनतेला भेडसावणाऱ्या समस्यांवर तत्परतेने काम केले पाहिजे. माझ्या वैयक्तिक पाठपुराव्यानंतरही बऱ्याच दिवसांनी सरकारला जाग आली हे खरोखरच खेदजनक आहे, असे डिकॉस्‍ता यांनी सांगितले.