मडगाव: मडगाव पोलिस कोठडीत असताना नावेली येथील एडबर्ग परेरा याला झालेल्या कथित मारहाणीप्रकरणी निलंबित पोलिस उपनिरीक्षक निलेश शिरवईकर यांच्याविरोधात क्राईम ब्रँच लवकरच न्यायालयात आरोपपत्र दाखल करणार आहे.

सूत्रांच्या माहितीनुसार, या संदर्भातील प्रक्रिया अंतिम टप्प्यात आहे. ऑक्टोबर २०२५ मध्ये मडगाव पोलिसांनी एडबर्ग परेरा याला अटक करून कोठडीत ठेवले असताना ही मारहाण झाल्याचा आरोप आहे. या घटनेनंतर सामाजिक संघटनांनी आवाज उठविल्यानंतर शिरवईकर यांच्याविरोधात मडगाव पोलिस ठाण्यात गुन्हा दाखल करण्यात आला होता. त्यानंतर या प्रकरणाचा तपास क्राईम ब्रँचकडे सोपविण्यात आला. तपासादरम्यान क्राईम ब्रँचने अनेक साक्षीदारांचे जबाब नोंदवले असून, मडगाव पोलिस ठाण्यातील सीसीटीव्ही फुटेजही ताब्यात घेतले आहे.