Margao News : मडगावबद्दल ज्या मागण्या आहेत त्या सर्व विकासकामासंदर्भात आहेत व सरकारने त्या सर्व मान्य करून मंजुरीही दिली आहे. त्यामुळे अधिवेशनात मडगावचे प्रश्र्न विचारण्याचा प्रश्र्नच संभवत नाही.

अधिवेशनानंतर सर्व कामे वेगाने पूर्ण केली जातील, असे मडगावचे आमदार दिगंबर कामत यांनी पत्रकारांना सांगितले. फातोर्डा येथील मिलाग्रीन गोम्स या नगरसेविकेच्या आगाळी येथील प्रभाग 7 मधील विकासकामाचा शुभारंभ केल्यानंतर ते पत्रकारांशी बोलत होते.

आगाळी प्रभागातील विकास काम हे 17लाख रुपयांचे असून या भागातील सर्वांना त्याचा लाभ होईल. रावणफोंड येथे 7 कोटी रुपये खर्चून बांधण्यात येणाऱ्या सहा पदरी उड्डाणपुलाची पायाभरणी लवकरच केली जाईल. नंतर रावणफोंड जंक्शन ते खारेबांद पर्यंतच्या रस्ता दुरुस्ती, पदपथ, सौंदर्यीकरण 11 कोटी खर्चून केले जाईल व या कामाचा शुभारंभ 4 एप्रिल रोजी होईल,असेही त्यांनी जाहीर केले.

प्रभाग 7 मधील विकास कामाच्या शुभारंभप्रसंगी माजी आमदार दामू नाईक, नगराध्यक्ष दामोदर शिरोडकर, मिलाग्रीन गोम्स, कामिल बार्रेटो, श्र्वेता लोटलीकर, राजू नाईक हे नगरसेवक उपस्थित होते.