Mapusa : म्हापसा आणि आसपासच्या भागात शुक्रवारी (ता.७) मुसळधार पाऊस सुरू राहिल्याने जनजीवन विस्कळीत झाले. म्हापसा व बार्देश तालुक्यातील इतर ग्रामीण भागात झाडांच्या पडझडीच्या अनेक घटना घडल्या. तर पावसामुळे म्हापसा मार्केटमधील भाजी मार्केटच्या छताला गळती लागल्याने ग्राहकांसह भाजी मार्केट विक्रेत्यांना सध्या त्रास सहन करावा लागत आहे.

गेल्या काही दिवसांपासून सुरू असलेल्या संततधार पावसामुळे पालिका मार्केटमधील भाजी मार्केटच्या छताला गळती लागली असून त्यामुळे पावसाचे पाणी भाजी मार्केटच्या आवारात शिरत आहे. परिणामी, ग्राहकांसह विक्रेत्यांनाही मनस्ताप होत आहे. ग्राहकांना होणारा त्रास कमी करण्यासाठी भाजी विक्रेते भाजी मंडईतील साचलेले पाणी साफ करताना शुक्रवारी दिसत होते.

पालिकेकडून आश्‍वासनेच

एका विक्रेत्याने सांगितले की, छताला कुठेतरी गळती लागल्याने पावसाचे पाणी आतमध्ये गळत असल्याची आम्हाला कल्पना आहे. गेल्या दोन वर्षांपासून आम्ही म्हापसा पालिकेकडे या समस्या मांडत आहोत. परंतु, आश्वासनांव्यतिरिक्त अद्याप काहीही मिळालेले नाही.