बार्देश: मान्‍सूनपूर्व कामांचा समावेश असलेल्‍या गटारांची दुरुस्‍ती भरपावसात करण्‍यात येत असल्‍यामुळे म्‍हापशातील व्यापारी आणि विक्रेत्‍यांनी संताप व्‍यक्त केला आहे.

वेळेवर कामे होत नसल्यामुळच म्हापसा मतदारसंघ अविकसित राहिल्याची टीका गोवा राज्य शिवसेना प्रमुख जितेश कामत यांनी केली आहे. म्हापसा पालिका २० प्रभागांची असून त्यातील दोन प्रभाग हे हळदोणा मतदारसंघात समाविष्ट करण्यात आलेले आहेत.

त्यामुळे १८ प्रभाग मिळून म्हापसा मतदारसंघ आहे. पण येथे गटार व्यवस्था कोलमडलेली असल्याने पावसाचे पाणी रस्त्याच्या बाजूला असलेली दुकाने व घरांमध्‍ये जाऊन लाखो रुपयांचे नुकसान होत आहे. ही समस्‍या वेळीच सोडविणे गरजेचे आहे, असे कामत म्‍हणाले.

म्हापसा पालिकेने पावसापूर्वीची तयारी म्हणून काही गटारांची साफसफाई केली आहे. परंतु ज्या गटारांचे बांधकाम नव्याने सुरू करण्यात आले आहे, त्यातील काही ठिकाणची गटारे अर्धवटच ठेवण्यात आली आहेत. तर, स्वच्छता केलेल्या गटारांतील माती, चिखल, दगड काढले खरे,पण ते पुन्हा गटारावरच ठेवण्यात आले आहेत. त्‍यामुळे आता पावसाळ्‍यात मोठी समस्‍या निर्माण होत आहे.