Goa Congress on Mapusa: आमदार ज्योशुआ डिसोझा यांचे आपल्‍या मतदारसंघाकडे दुर्लक्ष झालेले आहे. बाजूच्‍याच कळंगुट मतदारसंघातील रस्ते तेथील आमदाराने हॉटमिक्स डांबरीकरणाद्वारे गुळगुळीत करून घेतले आहेत.

म्हापशातील रस्‍ते खड्ड्यांनी भरलेले आहेत. पावसाळ्यापूर्वी हे रस्ते दुरुस्‍त केले नाहीत तर पावसाळ्‍यात वाहनचालकांना बराच मन:स्‍ताप सहन करावा लागेल, अशी भीती काँग्रेसचे उत्तर गोवा प्रवक्ते संजय बर्डे यांनी व्‍यक्त केली.

म्हापसा कार्व्हालो पेट्रोलपंपाजवळ जी दुकाने होती, ती पालिकेने पाडली. त्या दुकानदारांना जागा देतो म्हणून सांगितले होते. परंतु ती जागा देताना दुकानदारांना येथील दुसऱ्या मजल्यावर दुकाने दिली. त्‍यामुळे तेथे ग्राहक फिरकतही नाहीत. म्‍हणून या दुकानदारांचा त्‍यास विरोध असल्याचे बर्डे यांनी सांगितले.

म्‍हापसा मतदारसंघात रस्‍त्‍यांबरोबरच वीज व वाहतूक कोंडीचीही समस्‍या आहे. आमदार डिसोझा यांच्‍या वारंवार परदेशी दौऱ्यांमुळे त्‍यांचे आपल्‍या मतदारसंघाकडे दुर्लक्ष झाले आहे. उपसभापती असूनही त्यांना विकासकामे करता येत नाहीत.

यावरून ते या मतदारसंघाचे निष्क्रिय आमदार असल्याचे स्‍पष्‍ट होते, अशी टीका बर्डे यांनी केली. यावेळी त्यांच्यासमावेत गजानन नाईक, भारत च्यारी, दत्ता घाडी, चंद्रकांत पेडणेकर, सिद्धेश मोरे उपस्थित होते.