Land Grabbing Case : तिसवाडी तालुक्यातील गवळी-मौळा येथील ‘कोतपोत’ या नावाने ओळखल्या जाणाऱ्या सुमारे पावणेदोन लाख चौ. मी. जमिनींचे बनावट दस्तावेज तयार करून त्याची विक्रीखत केल्याप्रकरणी पोलिस स्थानकात गुन्हा नोंद करण्यात आला होता. याप्रकरणी माडेल-थिवी येथील संशयित सिद्दीकी ऊर्फ सुलेमान खान याला म्हापसा न्यायालयाने अटकपूर्व जामीन नाकारला. तपास यंत्रणेला या प्रकरणाची चौकशी करण्यासाठी हा अर्ज फेटाळण्यात येत असल्याचे न्यायालयाने दिलेल्या आदेशात म्हटले आहे.

राफाईल लुईस जोझ लोबो यांनी वाळपई पोलिस स्थानकात संशयित सुलेमान खान व इतर चौघांविरोधात तक्रार दाखल केली आहे. या पाचजणांना कटकारस्थान रचून तिसवाडी तालुक्यात कुडका पंचायतीमधील सर्व्हे क्रमांक 36/0 मधील 1,09500 चौमी, सर्व्हे क्रमांक 37/0 मधील 38,325 चौमी तर सर्व्हे क्रमांक 38/1 मधील 38,250 चौमी जमीन बनावट दस्तावेज तयार करून ती वाळपई येथील उपनिबंधक कार्यालयात सादर केली होती. त्यानंतर बनावट दस्तावेज व सह्या करून या जमिनींची खतविक्री केल्याचे तक्रारीत नमूद करण्यात आले होते. राज्यातील जमीन हडपप्रकरणीचा तपास सध्या स्थापन करण्यात आलेल्या एसआयटीमार्फत सुरू आहे.

चौघांचा हात

1 वाळपई पोलिस स्थानकात नोंद असलेल्या ही तक्रार या एसआयटीकडे देण्याची शक्यता असल्याने अटक होण्याच्या भीतीने संशयित सुलेमान खान याने हा अर्ज सादर केला होता. न्यायालयातील अटकपूर्व जामिनावरील सुनावणीवेळी ही तक्रार सध्या वाळपई पोलिस स्थानकातच असल्याने त्याच्या अर्जाला विरोध केला होता.

2 या प्रकरणातील संशियतांचा शोध घेण्यात आला मात्र अजूनही सापडलेली नाहीत. संशयित सुलेमान खान याच्यासह इतर चारजण या जमीन हडप प्रकरणात गुंतलेले आहेत. या प्रकरणाच्या सखोल चौकशीसाठी सुलेमान खानला अटकपूर्व जामीन देऊ नये असा युक्तिवाद करण्‍यात आला होता.