21 Year Boy drowned At Assagao : गिरी म्हापसा येथील 21 वर्षीय युवकाचा आपल्या मित्रांसह मंदिराच्या तलावात आंघोळ करत असताना बुडून मृत झाल्याची घटना घडली आहे. ही घटना रविवारी सायंकाळी 7 वाजण्‍याच्‍या सुमारास घडली. याप्रकरणी हणजूण पोलिसांनी अनैसर्गिक मृत्यूची नोंद करुन पुढील तपास सुरु केला आहे.

पोलिसांनी दिलेल्या माहितीनुसार, गिरी व इतर परिसरातील 15 ते 22 वर्षे वयोगटातील आठ मुलांचा एक गट आसगाव येथील बाळा साखळेश्वर देवस्थान परिसरातील तळीत आंघोळ करण्यासाठी आला होता. यावेळी काही युवक व अँथनी फर्नांडिस (21, रा. गिरी) आंघोळीसाठी पाण्यात उतरले होते.

मात्र, आंघोळ करत असताना अँथनी या युवकाचा बुडून दुर्दैवी मृत्यू झाला. घटनास्थळी स्थानिकांनी दाखल होत युवकाला बाहेर काढले. घटनेची माहिती मिळताच हणजूण पोलिस घटनास्थळी दाखल झाले.

युवकाला तत्काळ म्हापसा येथील आझिलो रुग्णालयात दाखल करण्यात आले. मात्र, त्याचा मृत्यू झाल्याचे डॉक्टरांनी घोषित केले. हणजूण पोलिसांनी पंचनामा करून मृतदेह उत्तरीय तपासणीसाठी बांबोळी येथील गोमेकॉ इस्पितळात पाठविला. याबाबत पोलिस निरीक्षक प्रशाल देसाई यांनी माहिती दिली.