बार्देश : भूमिगत वीजवाहिन्यांसाठी म्हापसा मतदारसंघातील बरेच रस्ते खोदले होते. तेथे वाहिन्यांचे काम बरीच वर्षे सुरू आहे. हे काम अर्धवट राहिले असून रस्ता खोदलेल्या अवस्थेत आहे. या रस्त्यांचे डांबरीकरण केले नसल्याने वाहनचालकांना मार्गक्रमण करताना अक्षरश: कसरत करावी लागते. पादचाऱ्यांनाही जीव मुठीत घेऊन चालावे लागते.

या मतदारसंघातील रस्त्यांची पावसाळ्यात मुसळधार पावसामुळे दुर्दशा झाली आहे. ठिकठिकाणची माती वाहून गेल्यामुळे खोल खड्डे पडले आहेत. या खड्ड्यांमध्ये पावसाचे पाणी साचून राहते. त्यामुळे खड्ड्यांचा अंदाज येत नसल्याने वाहनांचे अपघात होत आहेत. अपघातांमुळे अनेक लोक जायबंदीही झाले आहेत. वाहनचालकांना या खड्डेमय रस्त्यांवरून वाहने चालविणे मुश्किल होत असल्याने त्यांनी तीव्र संताप व्यक्त केला आहे.

म्हापसा मतदारसंघाचे आमदार ज्योशुआ डिसोझा यांनी पावसाळ्यानंतर मतदारसंघातील सर्व रस्त्यांचे हॉटमिक्स डांबरीकरण करणार असल्याचे आश्वासन दिले होते. पण त्या अगोदर रस्त्यावर पडलेले खड्डे बुजविणार असल्याचे सांगितले होते.

पण त्याबाबत कोणतीही कार्यवाही झालेली नाही. त्यामुळे म्हापसा मतदारसंघातील रस्ते, मुख्यत: म्हापसा पालिका बाजारपेठेतील रस्त्यावर मोठमोठ्या खड्ड्यांमध्ये पावसाचे पाणी साचून त्याला तळ्याचे स्वरूप प्राप्त होते. गणेश चतुर्थीच्या काळात माटोळी आणि इतर साहित्य विक्रेत्यांना या पाण्यातच बसून माल विकावा लागला होता. हे रस्ते दुरुस्त करावेत, अशी मागणी युवा कार्यकर्ते सिद्धेश मोरे आणि सचिन किटलेकर यांनी केली आहे.

म्हापसा मतदारसंघातील कामरखाजन, एकतानगर, खोर्ली, समतानगर, धुळेर, करासवाडा, पेडे म्हापसा व इतर ठिकाणचे रस्ते पावसाच्या पाण्याने वाहून गेले आहेत. ज्याठिकाणी जे खड्डे पडले आहेत, त्या रस्त्यांवरून वाहने चालविताना चालकांना तारेवरची सर्कस करावी लागते. कामरखाजन, पेडे, एकतानगर व इतर काही ठिकाणचे रस्ते चिखलमय बनले आहेत.