पुणे: काँग्रेसने गेल्या ६० वर्षात कामगार वर्गाचा छळ केला तसेच त्यांना विकासाची समान संधी दिली नाही, अशी टीका गोव्याचे मुख्यमंत्री डॉ. प्रमोद सावंत यांनी केली. सावंत चिंचवड विधानसभा भाजप महायुतीचे उमेदवार शंकर जगताप यांच्या प्रचारसभेत बोलत होते. भाजपचे डबल इंजिन सरकार कामगारांच्या कल्याणासाठी काम करेल, असे आश्वासन यावेळी मुख्यमंत्री सावंत यांनी दिले.

चिंचवड विधानसभेसाठी भाजपने यावेळी दिवंगत आमदार लक्ष्मण जगताप यांचे बंधु शंकर जगताप यांना उमेवारी दिली आहे. जगताप यांच्या प्रचारासाठी वाल्हेकरवाडीत मुख्यमंत्री सावंत यांच्या प्रमुख उपस्थित प्रचारसभा आयोजित केली होती.

यावेळी चंद्रकांत नखाते, शत्रुघ्न काटे, नामदेव ढाके, सचिन चिंचवडे, गोरख धोत्रे, विलास सपकाळ यांच्यासह भाजप महायुते नेते आणि मोठ्या प्रमाणावर कार्यकर्ते उपस्थित होते.

कामगार आणि उद्योजक संवाद आणि स्नेह मेळाव्यात बोलताना मुख्यमंत्री सावंत यांनी काँग्रेसवर टीका केली. काँग्रेसने ६० वर्ष कामगारांचा छळ केला, त्यांना विकास प्रवाहात सामिल करुन घेतले नाही. तर भाजप पंतप्रधान नरेंद्र मोदी यांच्या नेतृत्वाखाली कामगारांसाठी कल्याणकारी योजना राबवत असल्याचे सावंत म्हणाले.

लेबर कार्डमुळे कामागारांना घर, मुलांसाठी शिक्षण, आरोग्य यासारख्या सुविधा मिळवणे सुलभ झाले आहे. केंद्र आणि राज्य सरकारने कामारांच्या कल्याणासाठी केलेल्या प्रयत्नाचे यावेळी मुख्यमंत्री सावंत यांनी कौतुक केले. तसेच, महायुती सरकारने पायाभूत सुविधा सुधारण्यासाठी काम केल्याचे त्यांनी नमूद केले.

राज्यात रस्ते, विमानतळ आणि लोहमार्ग तयार करण्यासाठी मोठे काम केल्याचे सावंत म्हणाले. महाविकास आघाडी सरकारच्या काळात अनेक उद्योग पुण्यातून बाहेर गेले. तर, महायुती सरकारच्या काळात राज्यात पुन्हा उद्योग आणि गुंतवणूक आणण्याचे काम झाले, असे सावंत म्हणाले.