Fire In Goa सध्या वाढत्या तापमानामुळे गोव्यात आगी लागण्याचे प्रमाण वाढले आहे. काल कोरगाव - देवसू येथे एका काजू बागेला आग लागल्याची घटना घडली होती. या आगीची तीव्रता एवढी होती की. या काजू बागेसह लगतची सागवान झाडे, आंबा कलमे आणि जमा करून ठेवलेला लाकूडफाटाही आगीच्या भक्षस्थानी पडला होता. आज शिवोलीत एका आंब्याच्या झाडाला दुपारच्या सुमारास आग लागल्याची घटना घडली आहे.

सदरची आग कशी लागली, आगीत किती नुकसान झाले याबाबत अद्याप तरी माहिती प्राप्त होऊ शकली नाहीय. मात्र ही आग लागल्याची घटना समजताच अग्निशामक दल घटनास्थळी दाखल झाले आहे. सदरचे आंब्याचे झाड हे कित्येक वर्ष जुने असून उंच असल्याने अग्निशामक दलाला आग विझवण्यासाठी कसोशीने प्रयत्न करावे लागत आहेत.

आगीमुळे परिसरात धुराचे लोट पसरले पाहायला मिळाले. दरम्यान सध्या गोव्यात आगीच्या घटनांमध्ये प्रचंड वाढ झाली आहे. मागील 48 तासात गोव्यात आगीच्या जवळपास 50 हून अधिक घटना घडल्या आहेत. अग्निशामक दल तातडीने घटनास्थळी पोहोचत असल्याने बऱ्याच आगीवर नियंत्रण मिळवणे शक्य झाले आहे.