पणजी: मांद्रेचे पंच रॉबर्ट फर्नांडिस यांच्याविरोधात महिलेचा लैंगिक छळ, मारहाण आणि गैरवर्तन केल्याचे आरोप ठेवण्यात आले आहेत. फर्नांडिस यांनी दाखल केलेला दोषमुक्तीचा अर्ज सत्र न्यायालयाने फेटाळून लावत आरोप निश्चित करण्याचे आदेश दिल्यानंतरही ते आरोप निश्चितीच्या सुनावणीसाठी अनुपस्थित राहिले.

त्यामुळे न्यायालयाने फर्नांडिस यांच्याविरोधात २० जुलै रोजी अजामीनपात्र वॉरंट जारी केले आहे. उत्तर गोवा सत्र न्यायालयाच्या अतिरिक्त सत्र न्यायाधीश आरतीकुमारी नाईक यांनी २६ जून रोजी दिलेल्या आदेशात रॉबर्ट फर्नांडिस यांनी भारतीय नागरिक सुरक्षा संहितेच्या कलम २५० अंतर्गत दाखल केलेला दोषमुक्तीचा अर्ज फेटाळून लावला होता.

तक्रारदार महिलेचा वैद्यकीय अहवाल, तिच्या पतीच्या जखमी झाल्याचा दाखला आणि प्रत्यक्षदर्शी साक्षीदारांचे पुरावे पाहता आरोपीविरोधात प्रथमदर्शनी भक्कम पुरावे उपलब्ध असल्याचे न्यायालयाने नमूद केले होते.

न्यायालयाने २६ जून रोजीच्या आदेशात आरोपीवर भारतीय न्याय संहितेच्या विविध कलमांनुसार खटला चालवण्याचे आणि आरोप निश्चित करण्याचे स्पष्ट केले होते. त्यानुसार २० जुलैला त्याला त्याच्यावर ठेवण्यात आलेले आरोप वाचून दाखवले जाणार होते. मात्र, सुनावणीवेळी फर्नांडिस अनुपस्थित राहिले. त्याचे वकीलही उपस्थित नव्हते.

प्रकरणाची पार्श्वभूमी

२ सप्टेंबर २०२४ रोजी दुपारी १२.२० वाजता मांद्रे येथील सर्व्हे क्रमांक २२६/१ जवळ मांद्रे पंचायतीतर्फे जागेची प्रत्यक्ष पाहणी सुरू होती. त्यावेळी पंच रॉबर्ट फर्नांडिस यांनी तक्रारदार महिलेशी वाद घातला.

तक्रारीनुसार, आरोपीने अश्लील आणि अत्यंत अपमानास्पद शब्दांचा वापर करत महिलेला धक्काबुक्की केली, तिच्या अंगाला चुकीच्या पद्धतीने स्पर्श करून लैंगिक छळ केला, तसेच तिच्या पोटात बुक्की मारून व पायावर लाथ मारून तिला दुखापत केली. मध्यस्थी करण्यासाठी आलेल्या तिच्या पतीलाही मारहाण करण्यात आली होती. याप्रकरणी मांद्रे पोलीस ठाण्यात गुन्हा दाखल करण्यात आला होता.