मडगाव: किरकोळ कारणावरुन डोक्यात कुऱ्हाड घालून खून केल्याची घटना राय येथे मे २०२० मध्ये घडली होती. याप्रकरणातील आरोपी विवेक देव सिंग याला कोर्टाने जन्मठेपेची शिक्षा सुनावली आहे. यासह एक लाख रुपयांचा दंड देखील ठोठावला आहे.

विवेकदेव सिंगने त्याचा सहकारी मुकेश सिंग (वय ३०, रा. राय मूळ झारखंड) याचा किरकोळ कारणावरुन खून केला होता. विवेकने मुकेशच्या डोक्यात कुऱ्हाडीने वार केल्यात यात जखमी झालेल्या मुकेशचा मृत्यू झाला होता. याप्रकरणी मायणा कुडतरी पोलिसांनी आरोपी विवेकदेव सिंग विरोधात ३०२ अंतर्गत गुन्हा नोंद करुन अटक केली होती.

दक्षिण गोवा सत्र न्यायालयात झालेल्या सुनावणीत विवेकदेव सिंग या खून प्रकरणात दोषी आढळला आहे. न्यायालयाने विवेकदेव सिंगला जन्मठेपेची शिक्षा सुनावत एक लाखांचा दंड ठोठावला आहे. ७५ हजार रुपये पीडितेच्या कुटुंबियांना देण्याचे आदेश कोर्टाने दिले आहेत.

विवेक आणि मुकेश हे दोन मजूर राय येथील एका भाड्याच्या खोलीत राहत होते. दोघांमध्ये किरकोळ कारणावरुन वाद झाला. यात मुकेश याचा मृत्यू झाला होता. घर मालकाने याप्रकरणी मायणा कुडतरी पोलिस स्थानकात तक्रार दिल्यानंतर खुनाचा गुन्हा नोंद करण्यात आला होता. पोलिसांनी आरोपी विवेकला राय चर्च येथून अटक केली होती.