Ponda: फोंड्यातील बेपर्वा मलनिस्सारण कामामुळे आणखीन एकाचे निधन झाले आहे. मे महिन्यात एका कामगाराचे मलनिस्सारण प्रकल्पाच्या चेंबरमध्ये बुडून मृत्यू झाला होता. त्यानंतर शनिवारी संध्याकाळी आलमगीर जुल्लर रेहमान (19, सध्या रा. बांदोडा, मुळ रा. पश्‍चिम बंगाल) याचा विजेच्या धक्क्याने बळी गेल्याचा आरोप होत आहे. तो कामाच्या शोधासाठी नुकताच गोव्यात आला होता.

(Man dies after contact with live wire near Ponda sewerage unit)

मिळालेल्या माहितीनुसार, पालिका इमारतीच्या समोरील मुख्य रस्त्यावर मलनिस्सारण प्रकल्पाच्या चेंबरचे काम सुरू असतानाच त्या ठिकाणी आलमगीरला विजेचा धक्का बसला. त्याला तत्काळ फोंडा आयडी उपजिल्हा इस्पितळात दाखल केले असता, तेथील डॉक्टरांनी मृत घोषित केले. मात्र, हा विजेचा धक्का की अन्य याबाबतीत शवचिकित्सा अहवालात स्पष्ट करण्यात आलेले नाही. त्यामुळे मयताचा व्हिसेरा अधिक तपासणीसाठी पाठवण्यात आला आहे.

कंत्राटदाराची निष्काळजी

मलनिस्सारणाच्या कपिलेश्‍वरी येथील चेंबरचे 12 मे रोजी काम सुरू असताना अचानक या चेंबरमध्ये पाणी शिरल्याने शुभम भोपळे (21, महाराष्ट्र) हा कामगार बुडून मरण पावला होता. कंत्राटदाराच्या बेपर्वाईमुळे हा मृत्यू झाल्याचा दावा करत पोलिस तक्रारही झाली होती. आताही कंत्राटदाराची चूक असल्याचा आरोप होत आहे.