म्हापसा : एका गॅरेजमध्ये पार्क केलेल्या कारमधील लॅपटॉप चोरीच्या आरोपाखाली म्हापसा पोलिसांनी संशयित निरंजन पाटील (करासवाडा) यास आज अटक करीत चोरीचा लॅपटॉप जप्त केला.

पोलिसांच्या माहितीनुसार, तक्रारदार केथ रुडॉल्फ डिसोझा (कामरखाजन) यांनी आपली कार दुरुस्तीसाठी गॅरेजमध्ये ठेवली होती व कारच्या मागच्या सिटवर 55 हजारांचा लॅपटॉप ठेवला होता. संशयितही या गॅरेजमध्ये आपली कार दुरुस्तीसाठी घेऊन आला होता. यावेळी त्याने फिर्यादीच्या कारमधील लॅपटॉप चोरून नेला.

फिर्यादीने घरी गेल्यानंतर आपला लॅपटॉप गायब असल्याचे आढळले असता त्यांनी आपल्या कार्यालयात व कर्मचाऱ्‍यांकडे चौकशी केली. मात्र, लॅपटॉप सापडला नाही. त्यानंतर काल आपण कार दुरुस्तीसाठी दिली होती याची आठवण झाली. त्यांनी गॅरेजमध्ये जाऊन तेथील सीसीटीव्ही फुटेजची तपासणी केली. त्यानंतर त्यांनी लगेच म्हापसा पोलिसांत तक्रार दाखल केली.

दुसरीकडे, कुजिरा-सांताक्रुझ परिसरातील बंद असलेल्या एका घराचे कुलूप तोडून चोरट्यांनी सुमारे दोन लाखांचा ऐवज लंपास केला. जुने गोवे पोलिसांनी या प्रकरणी संशयित मनदीप कुमार (24, उत्तरप्रदेश) याला अटक केली आहे. त्याची चौकशी सुरू आहे, मात्र चोरीस गेलेल्या ऐवज अजून मिळालेला नाही.