डिचोली: 'माझे घर' योजनेमुळे मयेवासीयांना आता घरांचा मालकी हक्क प्राप्त होणार आहे. सरकारच्या निर्णयामुळे यापुढे घरदुरुस्ती किंवा विभाजन करण्याची प्रक्रिया सोपी आणि सुटसुटीत होणार आहे, असे मुख्यमंत्री डॉ. प्रमोद सावंत यांनी स्पष्ट केले.

सरकारच्या 'माझे घर' योजनेच्या अर्ज वितरणाचा मयेतून शुभारंभ केल्यानंतर मुख्यमंत्री डॉ. प्रमोद सावंत उपस्थितांना मार्गदर्शन करताना बोलत होते. 'माझे घर' योजनेचा लाभघेण्यासाठी लोकांनी पुढे यावे, असे आवाहनही मुख्यमंत्र्यांनी यावेळी केले.

मये येथील पंचायत सभागृहात आयोजित केलेल्या या सोहळ्याप्रसंगी राज्यसभेचे खासदार सदानंद शेट तानावडे, आमदार प्रेमेंद्र शेट यांच्यासह उत्तर गोवा जिल्हा पंचायतीचे अध्यक्ष धाकू मडकईकर, उत्तर गोव्याचे जिल्हाधिकारी अंकीत यादव, डिचोलीचे उपजिल्हाधिकारी नेहाल तळवणेकर, सरपंच वासुदेव गावकर, शंकर चोडणकर, महेश सावंत आणि अन्य मान्यवर उपस्थित होते. तसेच या सोहळ्यास मये मतदारसंघातील विविध पंचायतींचे सरपंच, उपसरपंच आणि पंचसदस्य उपस्थित होते.

यावेळी मुख्यमंत्र्यांच्या हस्ते निवडक लाभधारकांना अर्ज वितरित करण्यात आले. दत्तात्रय परब यांनी सूत्रसंचालन केले. नेहाल तळवणेकर यांनी आभार मानले.

ऐतिहासिक योजना

'माझे घर' ही ऐतिहासिक योजना असून, या योजनेमुळे प्रत्येकाला हक्काचे घर मिळणार आहे. सर्वसामान्यांचे हित नजरेसमोर ठेवून पूर्ण अभ्यासाअंती मुख्यमंत्री डॉ. सावंत यांनी ही योजना अमलात आणली आहे, असे सदानंद शेट तानावडे यांनी यावेळी सांगून, ही योजना मार्गी लावल्याबद्दल मुख्यमंत्र्यांची प्रशंसा केली. या योजनेबद्दल होणाऱ्या अपप्रचाराला जनतेने बळी पडू नये, असे आवाहनही त्यांनी केले.