पणजी: माझे घर योजनेअंतर्गत लाभार्थ्यांच्या तक्रारी, शंका आणि विविध प्रश्नांचे त्वरित निराकरण करण्यासाठी उत्तर गोवा जिल्हाधिकारी कार्यालयाने विशेष हेल्पलाईन सेवा सुरू केली आहे. या उपक्रमामुळे योजनेशी संबंधित नागरिकांना आवश्यक माहिती आणि मार्गदर्शन एकाच ठिकाणी उपलब्ध होणार असून प्रशासनाशी संपर्क साधणे अधिक सुलभ होणार आहे.

जिल्हाधिकारी (उत्तर) कार्यालयामार्फत ८८०६९१७११९ हा हेल्पलाईन क्रमांक सुरू करण्यात आला असून कार्यालयीन वेळेत या क्रमांकावर संपर्क साधून नागरिकांना आपल्या तक्रारी नोंदवता येणार आहेत.

तसेच अर्ज प्रक्रियेबाबत, पात्रता, आवश्यक कागदपत्रे, अर्जाच्या स्थितीविषयी तसेच योजनेशी संबंधित इतर प्रश्नांबाबतही माहिती मिळू शकणार आहे.

माझे घर योजनेची अंमलबजावणी अधिक पारदर्शक, लोकाभिमुख आणि प्रभावी करण्याच्या दृष्टीने हा उपक्रम राबविण्यात आला आहे.

लाभार्थ्यांच्या अडचणींवर वेळेत कार्यवाही करून त्यांना अधिक चांगली सेवा देणे, तसेच प्रशासनाची प्रतिसादक्षमता वाढविणे, हा या हेल्पलाईनचा मुख्य उद्देश असल्याचे जिल्हाधिकारी कार्यालयाने स्पष्ट केले आहे.उत्तर गोवा जिल्ह्यातील माझे घर योजनेच्या लाभार्थ्यांनी किंवा अर्जदारांनी कोणतीही अडचण अथवा शंका असल्यास कार्यालयीन वेळेत या हेल्पलाईन क्रमांकाचा लाभ घ्यावा, असे आवाहन प्रशासनाने केले आहे.