मडगाव: सोनसोडो येथे होऊ घातलेल्या कब्रस्थानच्या जमिनीचा झोन बदल मागे घेण्यात यावा अशी मागणी करून उपोषणाला बसलेले मडगावचे नगरसेवक महेश आमोणकर (Mahesh Amonkar) यांची आज दुसऱ्या दिवशी प्रकृती खालावल्याने डॉक्टरांना पाचारण करण्यात आले. आज सायंकाळी त्यांचा रक्तदाब अचानक वाढल्याने त्यांना चक्कर आली.

त्यानंतर तातडीने 108 रुग्णवाहिका बोलाविण्यात आली. त्यांचा रक्तदाब वाढल्याचे लक्षात आल्यावर त्यांना पाण्यातून औषध घेण्याचा डॉक्टरांनी सल्ला दिला. मात्र आपण आमरण उपोषणावर असल्याने पाण्याचा थेंबही घेणार नाही असे सांगून त्यांनी औषध घेण्यास नकार दिला.

मडगावात (Margao) मुस्लिम लोकांसाठी कब्रस्थान बांधण्याचे काम मागील कित्येक वर्षे अडवून ठेवल्याने त्यांच्यावर अन्याय केला जात आहे. हे कब्रस्थान बांधण्यासाठी सोनसोडो येथे जी जमीन संपादित केली होती. त्या जागेवर अन्य प्रकल्प बांधण्यासाठी झोन बदल करण्याचा प्रस्ताव शहर विकास आराखडा समितीसमोर ठेवण्यात आला आहे. हा झोन बदल रद्द करावा यासाठी आमोणकर यांनी कालपासून उपोषण सुरू केले आहे.