पणजी: मडगाव रेल्वे स्थानकावरून २०१७ साली अल्पवयीन मुलीचे अपहरण केल्याप्रकरणी आरोपी रिझवान इंदू याला बालहक्क न्यायालयाने १० वर्षांच्या सक्तमजुरीची शिक्षा ठोठावली आहे. हा निकाल आज (९ जुलै) गोवा बाल न्यायालयाने सुनावला.

२०१७ पासून आरोपी तुरुंगात असल्यामुळे त्याने आतापर्यंत सुमारे सात वर्षांचा तुरुंगवास भोगलेला आहे, त्यामुळे उर्वरित तीन वर्षांचा शिक्षा कालावधी बाकी आहे. बालहक्क न्यायालयाने दिलेल्या निर्णयात आरोपीवर दोष सिद्ध झाल्याचे नमूद केले आहे.

भारतीय दंड संहिता कलम ३६३(ए) (अपहरण) अंतर्गत १० वर्षे सक्तमजुरी व २०,००० रुपयांचा दंड आरोपीला दिला असून तो दंड न भरल्यास अतिरिक्त १ वर्ष तुरुंगवास वाढवून मिळेल.

तसेच कलम ३६३ अंतर्गत ७ वर्षांची शिक्षा व १०,००० रुपयांचा दंड आणि दंड न भरल्यास अतिरिक्त १ वर्षाची शिक्षा व गोवा बालहक्क संरक्षण अधिनियम २००३ चे कलम ८(२) अंतर्गत ३ वर्षे तुरुंगवास व ५,००० रुपयांचा दंड दिला आहे. दंड न भरल्यास अतिरिक्त ६ महिन्यांची शिक्षा वाढवून मिळेल, असे देखील बालहक्क न्यायायलाने स्पष्ट केले आहे.

घटनेची पार्श्वभूमी

ही घटना ३१ ऑक्टोबर ते १ नोव्हेंबर २०१७ च्या मध्यरात्री घडली होती. पीडित मुलगी आपल्या पालकांसह मडगाव रेल्वे स्थानकाच्या प्लॅटफॉर्म क्रमांक १ वर झोपलेली असताना, आरोपीने तिला जबरदस्तीने पळवून नेले होते.

या घटनेनंतर कोकण रेल्वे पोलिस स्थानकाचे तत्कालीन निरीक्षक आणि विद्यमान पोलिस अधीक्षक हरीश मडकईकर यांच्या मार्गदर्शनाखाली तपास सुरू करण्यात आला होता. तपासादरम्यान मिळालेल्या सीसीटीव्ही फुटेजमुळे आरोपीची ओळख पटवून त्याला अटक करण्यात आली.