मडगाव: गणेमरड-शेल्‍डे (केपे) येथील सुनयना देसाई हिच्‍या मृत्‍यू प्रकरणाला ईएसआय इस्‍पितळाचे वैद्यकीय अधीक्षक डॉ. विश्‍वजीत फळदेसाई यांना दोषी धरून मडगाव पोलिसांनी त्‍यांच्‍याविरोधात गुन्‍हा नोंदविला आहे.

ही दुर्घटना १५ फेब्रुवारी २०२३ रोजी घडली होती. डाव्‍या हाताच्‍या अंगठ्यावर छोटीशी शस्‍त्रक्रिया करण्‍यासाठी या महिलेला मडगावच्‍या (Madgaon) ईएसआय इस्‍पितळात दाखल केले हाेते. मात्र, इस्‍पितळात ही शस्‍त्रक्रिया केली जात असताना ती महिला मृत पावली. या महिलेच्‍या नातलगांनी केलेल्‍या दाव्‍याप्रमाणे हा मृत्‍यू सकाळी झालेला असतानाही सायंकाळपर्यंत त्‍यांना कोणतीही कल्‍पना दिली नव्‍हती.

या प्रकरणात मृताच्‍या नातेवाईकांनी मडगाव पोलिसांत तक्रार देण्‍याचा प्रयत्‍न केला हाेता. मात्र, सुरुवातीला ही तक्रार नोंदविण्‍यात आली नव्‍हती. त्‍यामुळे मडगावच्‍या प्रथम वर्ग न्‍यायालयात दाद मागितली असता, ९ ऑक्‍टोबर रोजी न्‍यायालयाने (Court) डॉ. फळदेसाई यांच्‍याविरोधात गुन्‍हा नोंद करा, असा आदेश दिला. त्‍यानुसार काल रात्री हा गुन्‍हा नोंद करण्‍यात आला.