मडगाव: मडगाव शहरात ठिकठिकाणी बेकायदेशीररीत्या जाहिराती लावल्या आहेत आणि यामुळे शहराच्या सौंदर्यात बाधा निर्माण होतेय. यावर कारवाई करत दक्षिण गोवा जिल्हाधिकारी एग्ना क्लिंटीस यांनी येत्या ४५ दिवसांत एक मोहीम राबवून सर्व प्रकारचे बॅनर्स, पोस्टर्स किंवा जाहिराती काढून टाकण्याचे आदेश दिले आहेत.

दक्षिण गोवा जिल्हाधिकारी एग्ना क्लिंटीस यांनी जारी केलेल्या आदेशात त्यांनी मडगावमधील संबंधित अधिकाऱ्यांना सर्व बेकायदेशीर जाहिराती काढून टाकण्याचे आदेश दिले आहेत. दक्षिण गोवा जिल्हा अधिकाऱ्यांकडून गोवा मालमत्ता विद्रुपता प्रतिबंधक कायदा १९८८ च्या कलम ७ अंतर्गत हा आदेश देण्यात आलाय.

बेकायदेशीरपणे जाहिराती किंवा बॅनर्स लावल्याने शहर विद्रुप होते आणि परिणामी नागरिक तसेच पर्यटकांची गैरसोय होते. सध्या मडगाव शहरात वळणांवर, रस्त्यांवर पुलांवर तसेच फलकांवर जाहिराती लावल्या गेल्यात आणि शहराचे हेच विद्रुपीकरण थांबवण्यासाठी कारवाई करण्याचा आदेश जिल्हा अधिकाऱ्यांकडून देण्यात आलाय.

ही कारवाई पूर्ण करण्यासाठी संबंधित अधिकाऱ्यांना दोन महिन्यांचा अवधी देण्यात आलाय. याकाळात त्यांना शहरातील सर्व बेकायदा बॅनर्स, पोस्टर्स किंवा जाहिराती काढणं भाग असणार आहे. शिवाय वेळोवेळी अशी कारवाई करण्यात यावी आणि शहराचे विद्रुपीकरण न होण्यासाठी जनजागृतीही करण्यात यावी अशीही आदेश देण्यात आले आहेत. दक्षिण गोवा जिल्हाधिकाऱ्यांच्या आदेशांचे पालन न झाल्यास संबंधित अधिकाऱ्यांवर देखील कारवाई केली जाणार आहे.