सासष्टी: मडगावच्या एसजीपीडीए घाऊक मासळी मार्केटमध्ये मासळी घाणेरड्या पाण्यात जिमिनीवरच ठेवून विकण्याचा प्रकार उघडकीस आला आहे. मंगळवारी (ता.१) काही पत्रकारांनी घाऊक मासळी मार्केटमध्ये फेरफटका मारला तेव्हा असे प्रकार चलतात हे स्पष्ट झाले. त्या मासळी विक्रेत्याला यासंदर्भात विचारले तेव्हा त्याच्याकडे उत्तर नव्हते. त्याने लगेच आपल्या मजुराला कामाला लावून मासळी टोपलीत भरली.

दरम्यान, कॉंग्रेस नेते एल्विस गोम्स यांनी सांगितले की, मासळी मार्केटमध्ये अन्न व औषध प्रशासनचे अधिकारी, कर्मचारी नसतातच. फातोर्डामध्ये जेव्हा मासळीत फॉर्मेलिन वापरतात असे दिसून आले तेव्हा काही काळ ‘एफडीए’ने कडक नजर ठेवली; पण आता परत एकदा मासळीमध्ये फॉर्मेलिन आहे की नाही हे पाहण्यासाठी चाचणीचा अभाव दिसत आहे.

‘एफडीए’ने लक्ष ठेवावे

आता जी मासळी मार्केटमध्ये विक्रीस येते ती ताजी दिसण्यासाठी फॉर्मेलिनचा वापर होत असल्याची शक्यता कॉंग्रेस नेते एल्विस गोम्स यांनी व्यक्त केली आहे. सरकारने खासकरून ‘एफडीए’ने यावर लक्ष ठेवणे आवश्यक असल्याचेही गोम्स यांनी स्पष्ट केले.