Madgaon : लिंडन परेरा यांनी मडगावच्या नगराध्यक्षपदाचा राजीनामा दिला आहे. फातोर्ड्याचे आमदार आणि गोवा फॉरवर्ड पक्षाचे सर्वेसर्वा विजय सरदेसाई यांनी पत्रकार परिषद घेत ही घोषणा केली आहे. मडगाव मॉडेलला दिलेल्या शब्दानुसार गोवा फॉरवर्ड नगराध्यक्षपद सोडत आहे, नाहीतर आम्हाला कुणीही बाजूला काढू शकलं नसतं, असं वक्तव्य विजय सरदेसाईंनी केलं आहे.

गेल्या 15 महिन्यांपासून लिंडन परेरा मडगावच्या नगराध्यक्षपदी विराजमान होते. मडगावचे नगराध्यक्ष लिंडन परेरा हे 28ऑगस्टपर्यंत या पदावरून खाली उतरून हे पद दिगंबर कामत गटाच्या सदस्याला मोकळे करून देणार असल्याचे गोवा फॉरवर्डचे अध्यक्ष विजय सरदेसाई यांनी स्पष्ट केले. या विषयावर चर्चा करण्यासाठी सरदेसाई यांची मडगावचे आमदार दिगंबर कामत यांच्या बरोबर चर्चा झाली. त्यावेळी मी हा आमचा निर्णय कामत यांना सांगितला आहे असे सरदेसाई यांनी सांगितले होते.

मडगाव पालिका निवडणुकीत गोवा फॉरवर्डचे विजय सरदेसाई आणि काँग्रेसचे दिगंबर कामत यांनी एकत्र येऊन आपले संयुक्त पॅनल उभे केले होते. हे पॅनल जिंकून आल्यानंतर पहिले 15 महिने सरदेसाई गटाचा नगराध्यक्ष तर नंतरच्या 15 महिन्यासाठी कामत गटाचा नगराध्यक्ष असे ठरले होते.

28 ऑगस्टला ही मुदत संपत आहे. आम्ही सुरुवातीला जो शब्द दिला होता तो पाळणार आहोत. मडगावचा पुढचा नगराध्यक्ष कोण हे आता दिगंबर कामत आणि त्यांच्या गटाने ठरवायचे आहे असे सरदेसाई यांनी सांगितले आहे.