भारताचा माजी स्फोटक सलामीवीर वीरेंद्र सेहवाग याचा मुलगा आर्यवीर सेहवाग सध्या आपल्या फलंदाजीमुळे क्रिकेटविश्वात चर्चेत आला आहे. अंडर-१९ पुरुष आशिया कप २०२६ मध्ये संयुक्त अरब अमिरातीविरुद्ध (UAE) खेळताना आर्यवीरने शानदार शतकी खेळी साकारली. त्याने अवघ्या १६८ चेंडूंमध्ये १६० धावा फटकावत भारतीय संघाच्या विजयात मोलाची भूमिका बजावली. त्याच्या या खेळीत १७ चौकार आणि ७ उत्तुंग षटकारांचा समावेश होता. आर्यवीरच्या या कामगिरीनंतर त्याचा एक व्हिडिओ सोशल मीडियावर मोठ्या प्रमाणात व्हायरल होत आहे.
अंडर-१९ आशिया कपच्या प्रमोशनल व्हिडिओमध्ये आर्यवीरला त्याच्या फलंदाजीच्या शैलीबद्दल प्रश्न विचारण्यात आला होता. त्यावेळी त्याने आपले क्रिकेटमधील आदर्श खेळाडू विराट कोहली असल्याचे सांगितले. विशेष म्हणजे, केवळ वडील वीरेंद्र सेहवाग यांच्याप्रमाणे आक्रमक फलंदाजी करण्याऐवजी विराट कोहलीच्या शैलीत खेळण्याची त्याची इच्छा आहे. 'मी विराट कोहलीचा खूप मोठा चाहता आहे. मला फक्त सेहवागच्या शैलीत नाही, तर विराट कोहलीच्या शैलीत फलंदाजी करायची आहे,' असे आर्यवीरने या व्हिडिओमध्ये सांगितले. त्याच्या या वक्तव्याची सध्या क्रिकेट चाहत्यांमध्ये चर्चा सुरू आहे.
वीरेंद्र सेहवाग मैदानावर आपल्या आक्रमक फलंदाजीसाठी ओळखला जायचा. पहिल्या चेंडूपासून गोलंदाजांवर दबाव निर्माण करणे ही त्याची खासियत होती. दुसरीकडे विराट कोहली सातत्यपूर्ण कामगिरी, तंदुरुस्ती आणि दबावाच्या परिस्थितीत डाव सावरण्याच्या क्षमतेसाठी प्रसिद्ध आहे. आर्यवीरच्या UAE विरुद्धच्या खेळीत या दोन्ही शैलींचे दर्शन घडले. सुरुवातीला संयमाने फलंदाजी करत त्याने खेळपट्टीवर जम बसवला आणि त्यानंतर आक्रमक फटकेबाजीला सुरुवात केली.
UAE विरुद्धच्या सामन्यात आर्यवीरने सुरुवातीला सावध भूमिका घेतली. त्यानंतर धावा जमवण्याचा वेग वाढवत १३१ चेंडूंमध्ये शतक पूर्ण केले. विशेषतः ३७व्या षटकात उद्दीश सूरीच्या गोलंदाजीवर त्याने दोन षटकार आणि दोन चौकार लगावत आपली आक्रमकता दाखवून दिली. त्याच्या १६० धावांच्या जोरावर भारताने प्रथम फलंदाजी करताना ५० षटकांत ७ बाद ३०९ धावांचा डोंगर उभा केला.
३१० धावांच्या लक्ष्याचा पाठलाग करताना UAE चा संघ २३९ धावांवरच आटोपला. त्यामुळे भारतीय संघाने हा सामना ७० धावांनी जिंकत अंडर-१९ आशिया कपच्या उपांत्य फेरीत प्रवेश केला. आता पुढील फेरीत भारतीय संघाचा सामना अफगाणिस्तानशी होणार आहे. आर्यवीरची ही खेळी आणि विराट कोहलीबद्दलचे वक्तव्य यामुळे आगामी सामन्यात त्याच्या कामगिरीकडे क्रिकेटप्रेमींचे लक्ष लागले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.